أحب االشبكات الأجتماعيّة و لكن….

انا  كتير بحب الفيس بوك و التويتر…. يعني هم اشي كتير حلو….بعطينا فرصه  نشارك كل شي منحبو أو بعجبنا أغنيه , مقال.. مع كل الناس….

الفيس بوك بخلينا على اتصال مع صحابنا و زملاءنا و نعرف اخبارهم و تطورات حيانهم , نشاركهم بالمناسبات الاجتماعيه نفرح معهم و نزعل معهم… بحسو زي  جريده فيها أخبار الناس … بكره  عيد ميلاد لولو….  سوسو و سعيد خطبو…. ميسون و عدنان صار عندهم ولد…. ربى وعزيزه متزاعلين… سامر اشتغل… سمير ترك شغلو… محمود سافر.. عليا راسها بوجعها … سميره شكلها بتحب…. رنا مكتئبه … دعاء حياتها صعبه… و هكذا ….

تويتر بخلينا نلاقي ناس بشبهونا من كل العالم, ناس غالباً ما منعرفهم شخصي بس بصيرو جزء من حياتنا…. اهتماماتهم زينا…. عاداتهم و تقالبدهم و لغتهم مرات بتكون غير… بس بحب الواحد يلتقي فيهم… بشجعوه على اشياء جديده انا مثلأ صرت أقرأ اضعاف ما كنت أقرأ من قبل  ….:)

أحب مقولة  ” الأنسان يحتاج لكائنات تشبهه” …

بس في أشياء شخصيه  صرت أحس الناس بزيدوها لما ينشروها  -في الفيس بوك خاصه-..

يعني مثلاً خالد و هدى خاطبين .. خالد على كل بوست لازم يعلق لهدى و دايماً حبيبتي و عمري و حياتي و الله يخليلي ياكي و أنا من غير ما بعيش بمناسبه و من غير مناسبه… طيب ماشي فهمنا انك بتحبها بس مش ضروري تتغزل فيها هون… !

سلمى راحت رحله مع العيله على الصين و اول ما وصلو “I have just arrived”

كمان ربع ساعه “what a ncie hotel ”

كمان 10 دقايق “nice weather here in china”

تغدت بعرفش شو… نزلت على البحر…شربت قهوه…. تفاصيل الرحله الممله…

يعني كمان الناس شو الها؟؟؟

و مثلاً  البوم صور العرس كامل بنزل… يعني انا بعرف صور العرس بشوفوهم  الصحاب  و الأهل  القراب شو الو معنى كل صور العرس بتفاصيلو ينزلو على الفيس بوك..  انو صورة أو  صورتين مميزين  و الباقي مش للكل..

انا بتذكرأول  ما  صار عندنا انترنت و انا بالصف العاشر  كنت لما أقعد على المسنجر أحط صوره شخصيّه يبقو الناس تحكيلي “ما تحطي صورتك في برامج بالمسنجر بتخلي الناس ممكن يسرقوها”

ههه مش عارفه خايفين على صوره يا دوب مبينه..؟!

كمان في شغله أنو لازم الناس تراعي مشاعر الناس و نفسياتها… يعني قبل الفيس بوك و التويتر كان مجتمعنا الناس القراب منا اللي عايشين زينا .. هلأ صار المجتمع كبير في ناس مادياً و اجتماعياً ووظيفياً أحسن من ناس و الأنسان مرات لا أرادي بقارن حالو فيهم….. في ناس بضل راضيه بس في ناس ممكن تكره حياتها و عيشتها عشان هي بس عم بتقارن حالها بالناس اللي أحسن منها اللي عم بتشوف أخبارها و طلعاتها و مغامراتها أول بأول(و الله أعلم صح الحكي و لا لاً ممكن مرات الواحد عندو نقص معين نفسو فيه..بعبر عنو على الفيس بوك أو على تويتر و هو أصلاً ما عندو)

… http://yamama-sh.tumblr.com/post/1255069869 شوفو هاد المقال أنا كتير بحبو…

خايفه ييجي يوم  أكون أنا من الناس اللي أنا بعقلي بنتقدهم..!!

بانتظار رأيكم في الموضوع…. 🙂