تيتا الغاليه !

تيتا ! حبيبتي يرحم روحك و يغفرلك  و يجمعنا فيكي في الجنه ! كتير كتير اشياء حلوة راحت لما رحتي انتي كنتي كل شي حلو بحياتنا و الله ما انا عارفه كيف بدها تكون بلاكي ! كل شي هو يوم الجمعه .. و لا رمضان … ولا العيد .. هدول شو الهم معنى من غيرك ! كل الايام انتي كنتي احلى اشي فيها ! الله وحده بيعلم غلاوتك و احنا شو خسرنا بموتك .. الله يجزيك خير عنا ! سبحان القاهر عباده بالموت … انا لله و انا اليه راجعون !

image

توفيت جدتي في ليلة الجمعه 21/3/2014 كنت جايبتلها وردات يوم الام بنفس الليله و هي رتبتهم بالمزهريه و زبطتهم الحمدلله انها عاشت بصحتها و كل اللي بعرفها كان يحبها!
راحت تيتا و ضلو الوردات ! الله يرحمك و يغفرلك يا حبيبتي و يجمعنا فيكي في الجنه ! ادعولها انتو كمان !

image

سمارت فون جديد …

بال 2010 اشتريت اول سمارت فون “galaxy ACE ”  اشتريته ب 300  دينار !

كان معي قبله nokia n7  فكان نقله نوعيه

ابوي بس عرف استعجب ! انه حد بشتري موبايل ب 1500 شيكل ولو !!!

هاد موبايلي القديم

Samsung_Galaxy_Aceاول ما اشتريته  كان اشي رهيب ! كل شي فيه كان جديد و غريب و فايبر وواتس اب و ابليكيشن كتير حلوه !

من سيئاته كانت انه كتير ابليكيشن متل (تويتر و الواتساب)  بس تنزل على الميموري الداخليه للجهاز اللي هي اصلا صغيره و كمان فوق هاد محجوزه من ابليكيشن ما بتلزمني نازلة اصلا مع الجهاز متل ال free office

فنصيحه لما تشتري سمارت فون تاكد من انه ما في شركات دافعه لشركة الموبايل عشان تنزلها ابليكيشانات ما بتلزمك و بس بتاخدلك من الميموري

جديد …  كل الابليكيشنات المهمه الي (linked in , facebook, twitetr, whats app, instargram , google play )  كلها عملت تحديثات  بتستهلك كتير من الذاكرة الداخلية ..و كمان الفيرجن القديمه بكتير منها متل Linkedin  بطلت تشتغل !

لما اشتريت موبايلي كان لسا samsung s2  مش نازل !

من ال 2010 لليوم … نزل s2,s3,s4 , note2  و اشياء تانيه grand , duos  و غيرهم !

كل واحد اله مواصفات احسن من اللي قبله بشوي و باسعار مش قليله و الحلو كل الناس حاملينهم الغني و الفقير .. الصغير و الكبير و كل ما حد يدفع مبلغ سعر موبايل  احكي (مجانين الناس يعني انا لو معي ملايين بدفعش 2000حق موبايل ) (بالاخر دفعت اكتر )

جربت احسن جهازي فكرت المشكله بتنحل بس احط SD CARD   كبيره و انزل سوفتوير … بس ما انحلت لانه الابليكيشن حتى لو نزل على الذاكرة الخارجيه خلال الاستخدام بياناته بتنزل على ذاكرة الهاتف الداخليه اللي هي كتير صغيره .. فدايما تطلعلي مسج MEMORY FULL  DELETE SOME DATA  و امحي داتا و بعد يوم ترجع نفس المسج لا زهقت لما اشتريت فقررت اشتري موبايل جديد…:)

المهم طلع ما عندي مبدأ .. و دفعت بلاوي عشان اجيب NOTE3  .. من مبدأ تاني “اللي هو الواحد مشتري مشتري  ما يشتري احسن اشي و اجدد اشي :)

الصراحه الجهاز طلع رهيب ! كتير حلو بس كله كماليات ! شو فارقه علي انا و انا بكتب النوت اكتبها بالقلم بدل ما اكتبها باصبعي !  هيك بحس حاله الواحد من الطبقه البرجوازيه و هو بستخدمه :D

كمرته رهيبه فيها استوديو لحالها ..منها فيتشر بيوتي فيس beauty face بطلع وجهك حلو كانك حاطط فاونديشن ! و في معه ابليكيشن كتير متل ال flipBoard  ما كانت تنزل على جهازي القديم !

كتيير فيه اشياء حلوه ! بتوقع لو بدي ابحث و هيك بلاقي مواصفات لجهاز جيده بسعر معقول بس اعلانات ال Note 3 اللي بشوفها بكل مكان شكلها كتير اثرت فيي !

فمبروك علي جهازي الجديد … و اصلا اذا انا ما حملتش note 3  مين بدو يحمل ;)

بس توقعاتي السنه الجاي متل اليوم يكون نوت 3 اشي قديم و نازل 10 اجهزة اجدد منه ! عزيزتي سامسونج شوي شوي علينا لو سمحتي !
و يللا اي حد عندو ابليكشن حلو بنصح فيه للاندرويد يحكيلي عنه :)
image

image

شوفو كيف الملتي ويندوز و الكتابه بالقلم :D

ما جعل #2013 جميله …

هاي السنه كتييير مش فارق معي  انه خلصت سنه و بلشت سنه جديده …ما صار اشي مميز بال2013 بس  2013 كانت حلوه ..!  لو 2014 بتكون متلها بكون منيح (حلوة عللى الصعيد الشخصي) اما على صعيد الوضع العام في العالم العربي من سوريا لفلسطين للعراق للبنان فهو سيء …سيء جدا ! بس قد ما كان الوضع سيء حولينا حياتنا الشخصيه بتمشي عادي اه منكد شوي بعدين منرجع منعيش طبيعي !

و انا بقرأ تايم لاين تويتر قرات تويتة “كل عام وأنا أجد في نفسي مايستحق الإحتفال !””  … فلما فكرت فيها .. الحمدلله وجدت بنفسي كتير اشياء تستحق الاحتفال  :)

ما جعل 2013 جميله …

عائلتي

تيتا تو تيتا ماما و بابا و زيد كريم احلى اشي بالحياه

ااصدقائي

ربا و لنا و زينه و ايمان و رنا و دعاء و سهى ولبنى و لينا و نانا و علا و منى و شذى و ديالا و هلا و هند و شرين و مي   و غيرهم الكثير ! فالحمدلله على وجودهم

شغلي

وضعي الوظيفي تحسن .. و بقدر اعترف اني بحب شغلي نسبيا   :)

تسعة قروش

تشرفت بكوني جزء من مجموعه خيريه اطلقنا عليها اسم تسعة قروش … ايه ,مي , الاء ,عميد, جعفر , هبه,انس ,حسن و ايات شكرا لكم

زورو صفحتنا و مدونتا

مع اسفي اني اقل عضو فعال و نشيط فيهم !

اني تعرفت على ناس هيك خلاني اشعر انه لسا الدنيا بخير

كتب :

قرات اكتر من 13 كتاب  (او ممكن روايه) يعني ما يعادل كتاب واحد بالشهر !

هلأ بعرف انه مش كتير … !  بس انا حاسيته منيح  عالاقل دايما يكون معي اشي اقراه

الكتب اللي قراتها بال 2013  جمعلي ياها جودريدز  … في كتب متل حلم رام الله مشيت فيهم منيح بس ما يعجبوني فما اكملهم !

ان شاء الله السنه الجاي بصيرو الضعف او اكتر

read

قناعاتي

قناعاتي تتلخص في اقتباس من مقال للدكتور مصطفى محمود

“كلنا نخرج من الدنيا بحظوظ متقاربة برغم ما يبدو في الظاهر من بعد الفوارق و برغم غنى الأغنياء و فقر الفقراء فمحصولهم النهائي من السعادة و الشقاء الدنيوي متقارب. فالله يأخذ بقدر ما يعطي و يعوض بقدر ما يحرم و ييسر بقدر ما يعسر.. و لو دخل كل منا قلب الآخر لأشفق عليه و لرأى عدل الموازين الباطنية برغم اختلال الموازين الظاهرية.. و لما شعر بحسد و لا بحقد و لا بزهو و لا بغرور “ المقال كامل
فانت شو ما كنت مظلوم … و شو ما شايف ناس احسن منك يمكن انت بكرا تصير احسن منهم … او حتى يمكن انت هلا احسن منهم بس بتفكر انهم احسن منك … يمكن عم بكتب هاد الحكي من كتر ما بتفاجأ بنفسيات مريضه  بكونو عايشين منيح بس مش مبسوطين لانه مشغولين بغيرهم شو معه و شو عنده … السعاده في النهايه اسلوب حياه و ليست وجهه ! و اللي بضل بقارن حاله بغيره كتير بتعب … غير انك انت شايف صفحه من حياة انسان (فتره من عمره) و مش شايف باقي صفحات حياته (اللي يمكن توصل 100 سنه ) و اللي الله اعلم شو فيها هم و نكد و حزن …

الانسان قد ما كان شايف حاله و عامل حاله اشي كبير ف هو ضغيف و مسكين ! يعني الانسان لو اذاك هو اصلا مسكين و منيح فما تكرهه

” لقد خلقنا الانسان في كبد “

“و خلق الانسان ضعيفا” صدق الله العظيم

الشبكات الاجتماعيه

لسا كفة تويتر عندي راجخه على كفة الفيس بوك ! و التدوين كان قليل جدا تلخص في هاد اللينك :)

اه من الاشياء اللي بضحك اللي صارت معي بال 2012  انه عندي تويته جابت 208 ريتويت !! المشكله انها صورة و مش الي و لا للشخص اللي انا رديت عليه فيها  هي لمصور مصري اظن اسمه صالح الموسى  فيها صورة جمل بالتلج  , انا بس ضفت عليها  تعليق “جمل قطبي” ! jamal

النكته مش هون !!

الاشي اللي بضحك انه اجاني يمكن 10 منشن بتهموني اني انا ضد حقوق الحيوان و انه انا كيف تاركه الجمل المسكين بالصحرا و كيف تاركته بلا اكل لانه شكلو نحيف و حزين… اخدت كورس بحقوق الحيوان من هاي التويته هلأ بقرئكم ! (هلكت و انا افهمهم انه و الله هاد الجمل مش الي … انا بس عملت شير مش اكتر )

و كمان 3 وكالات انباء وحده اميركيه ووحده صينيه طلبو مني الصوره مقابل يعطوني مصاري ! (و طبعا انا اعتذر و اذكر اسم المصور )

jamal2 jamal3

كان اشي بضحك ! :D

و على سيرة الجمل و التلج  فبال 2013 اتلجت تلج بنابلس من زمااان ما صار ! فكرنا حالنا عايشين بموسكو فترتها !

كسر و خرب و دلفت سقوف بيوت و متنا برد و قارمات المحلات وقعت و الكهربا قطعت و… بس و الله التلج و هو بنزل حلو و لعبنا فيه !

و هيك بكون التدوين اخر اشي اعملته بال 2013 و اول اشي عملته بال 2014 :)

فالحمدلله دائما و كل عام و انتم الى الله اقرب 

كل عام و نحن نجد في انفسنا ما يستحق الاحتفال  ؛)

انا و القهوة !

قهوتي الصباحيه :)

قهوتي الصباحيه

اليوم اكتشفت اني بحب القهوة زياده عن اللزوم !  تقريبا صار عندي ادمان

بدي ارد على محمود درويش ” أحب الشيء وأنقلب عليه كي لا يستعبدني. ”  … بديش احبها خلص ! :D

اليوم  اول يوم بصوم من ايام العشره الاوائل من ذي الحجه … الساعه عشره الصبح وصلت لمرحله انه يمكن افطر بس عشان اشرب كاسة القهوه !

الحمدلله ما افطرت ..:) اما برمضان فالصيام فش في تشاور عقلك تفطر و لا تكمل صيام لانه فرض !  بعدين سبحان الله اول يومين بكون صعب بعدين بصير الصيام اسلوب حياه و كل عاداتنا و اوقاتنا منقدر نغيرهم فيه بسهوله …

بس لا لا شو انقلب عالقهوه ! هو كل يوم بدي اصوم انا !

برضو  ” القهوة لمن ادمنها مثلي هي مفتاح النهار ” … و اشي زاكي تبلش فيه نهارك  … “(طالع في بالي محمود درويش اليوم )

و انا اوافق مريد البرغوتي جدابهاد الاشي “أعظم ما في القهوة ” التوقيت” ، أن تجدها في يدك فور تتمناها. فمن أجمل أناقات العيش، تلك اللحظة التي يتحول فيها “تَرَف” صغير إلى “ضروره ”  :)

تأملات قرآنيه : و العاديات

PIC-370-1320437222
سبحان الله سورة العاديات لما تفهم تفسيرها يتحس انه بسطرين صورتلك معركة فيها خيول و غبار و جموع اعداء ! متل بالصورة بالضبط بس في خبال راكب عالخيل و اعداء و راه  #اعجاز
وَالْعَادِيَاتِ ضَبْحًا }أي الخيل العاديات عُدُواً بليغًا قويًا، يصدر عنه الضبح،وهو صوت نفسها في صدرها، عند اشتداد العَدْو …
{فَالْمُورِيَاتِ قَدْحًاً } تقدح النار من صلابة حوافرهن [وقوتهن] إذ عدون…
{ فَالْمُغِيرَاتِ صُبْحًا } غالبا الغارة على الاعداء تكون صباحًا،
{ فَأَثَرْنَ بِهِ نَقْعًا} أي: بعدوهن وغارتهن غبارًا …
{ فَوَسَطْنَ بِهِ جَمْعًا } أي توسطن براكبهن جموع الأعداء، الذين أغار عليهم
اكتشفت اني انا ناسيه تلات ارباع جزء عم ! فقررت اراجعه ! بس وصلت سورة العاديات ما عرفت احفظها الا بس فهمتها :)

متفرقات 2 :)

هاد الاختراع الجديد اللي اسمه متفرقات بمناسبة اني بشتاق للمدونه و ما عندي اشي محدد اكتبه !  :/

بدي اشتري سياره

من اسبوع كنت نازله عالسوق و بدي اروح بتكسيات المجمع و انا على درج المجمع خطر في بالي انه جاي عبالي اشتري سياره يا الله صرلي 4 سنين بشتغل و مو مجمعه حق سياره ( الحمدلله سيارة ابوي موجوده و لما بتلزمني باخدها ) بس انه خطر في بالي انه عن جد بدي سياره الي لحالي بلا نكد التكسيات و جميلة اخوي تعال خدني و تعال جيبني … و انا نازله عالدرج و بفكر كان على الدرج الجنبي  شب حامل كرسي عليه شب تاني مقعد و كتير متغلب بحمله عالدرج لدرجه كنت بدي احكيله خليني اساعدك … فالمهم اكتشفت انه  الواحد يكون عنده رجلين احسن  60 مليون مره مما يكون عنده سياره ! بس برضو اتمنى خلال عشرين سنه اكون جمعت حق سياره   :D

قرارات خاطئه

كتير عم بصير  معي اشياء تطلب قرارات حاسمه و مرات بقرر الاشي  و بكون عارفه انه خطا بس جاي عبالي اجرب الخطأ … ! اليوم كنت افكر بقرار اخدته و احكي بعقلي انه بركي رح اندم بالمستقبل و اثناء التفكير مرينا على مقبره تذكرت انها كلها  بالكتير 80 سنه تانيه و بموت و ببطل لقراراتي اهميه  ولا وجود ااصلاً .!.فش اشي مستاهل نندم  و لو كان قرار خطا شو يعني ..بالاخر الدنيا خيارات بجرب الواحد يعيشها زي ما بده يا بتصيب يا بتخيب !

مش  كائن فضائي !

يا اخي في ناس النفاق و التملق بدمهم (تلات ترباع البشريه ) بس لانه فلان  ابن عم فلان بصيرو بفخموه و بعظموه  و يخافو منه لدرجة انه انا بصير مش طايقته قد ما الناس عامالو حساب و خايه منه او متامله منه  … !  و بس اتعامل معه بطلع كائن بشري منيح و طبيعي جدا  ما اله علاقه بشو بحكو عنه !

كتب

صرلي شهر بقرا بكتاب شارون و حماتي !

عوباما

اوباما كان اليوم  بزياره تاريخيه النا و لدولة اسرائيل الشقيقه عنا   طيارات كانت بتلف بكل رام الله ….حركة شوارع توقفت…مدارس و شركات عطلت و  الاف من الشرطه و رجال الامن عشان يحافظو على سلامته .. باسرائيل سكرو المدارس ؟ اكيد لا !

البوطي

اليوم  اغتالو ( مين هم ؟؟ الله اعلم ) محمد سعيد رمضان البوطي بسوريا ! الله يرحمه ! بغض النظر عن موقفه من نظام السوري كنت من زمان كتير احب اشوفه على التلفزيون لانه بشبه سيدي الله يرحمه بالشكل ! و اللي عم بصير بسوريا اشي ما بنفهم !

عيد الام

بمناسبة عيد الام و بعد التغلب على المخاوف الصحيه و الوساوس المتعلقه بالاشعاعات جبنا عالدار الاختراع اللي اسمه مايكرويف  !

Facebook Application

عملت جديد FACEBOOK APPLICATION  لمسابقه بمناسبة عيد الام و مشي منيح الحمدلله

دعاء

اللهم اجعلنا اغنى خلقك بك و افقر عبادك اليك

اقسام الناس بالفلانتاين !

KONICA MINOLTA DIGITAL CAMERA

شكلي اول مره انا بشهد الفلانتاين في عصر الشبكات الاجتماعيه ؟؟؟ !!!

مظاهر الفلانتاين على الفيس بوك و تويتر انقسمت هيك…

1. ناس بحتفلو بعيد الحب و نازلين يحبو في بعض  بطريقة بضحك  our love cake mn 7abeebee  o my valentine gift o thank you 7ayatii 3l sahra al 7elweh …thxx my love for the beautiful night   و الى آخره

2. ناس بتلطم على حالها  انهم مش مرتبطين !!  و عن جد بشكو و ببكو و بتحزونو

3. شيوخ نازلين بوستات  بحرمة هذا اليوم و انه نسبه للقديس فلانتاين  (قصة القديس فلانتاين  قراتها 90 مره من  مبارح  لليوم ببوستات  مكتوبه  ضد هذا العيد )

4.وطنيين ! دخّلو الاسرى و الشهداء و الدم و الاحتلال بالفلانتاين و انه كيف يعني انتو بتحتفلو بالفلانتاين و فلسطين لسا محتله كييف اه؟؟ مثلا خدولكم هالبوست ” عذرا للفلانتاين فورودنا لا تذهب الا لقبور شهدائنا ” نوووو كومينت !!!!!

5 . ناس متلي هيك عم  بتخوتو على الناس شو عم تعمل ..

بس هو الصراحه كلنا عملنا من الفلانتاين اشي  و احنا مندعي انه مش سائلين فيه ..

طيب انا مبارح تذكرت انه اليوم الفلانتاين من ستيتس هيك  ”  أعزائي وعزيزاتي الحبيبة …بسلم عليكم سامر العيساوي …”

الحمدلله اللي تذكرت كان راح علي…

ملا الله بالمحبه ايامكم و كل فلانتاين و انتم الى الله أقرب .. ! :)