اليوم بالسوق !

نزلت اليوم على السوق و انا اصلا بكره السوق و بكره انزله بس مضطره… بكون نفسي اعطي مصاري لحد يحبلي اللي بدي ياه من غير ما انزل !

المهم شفت شغلتين غريبين …

 

كنا عند محل اواعي انا و صاحبتي . فاجت بنت.. لابسه شاله مبينه رقبتها … و نازله منها نص غرّتها ..و حاطه حلق..و مكياج بالوان عجيبه…. و لابسه بودي زهر و بنطلون فايت بالكرته . شافت بلوزه لونها عادي كتير هادي و حلو حكت للبياع ” لا لا هاي الالوان الجريئه انا ما بحب البسها ”

يا باي و هي حكت هيك شو ضحكت !!  كنت بدي احكيلها ابدأ مش جريئه أبداً !

(انا مش مع التعليق على اللبس كتير .. بس في لبس خارج عن المألوف …  مش عارفه هي شو تعريف الجرأه باللبس عندها ! ) 😀

 

و احنا ماشيين..

مريت على عجوز ختياره التجاعيد هالكه و جها و مرقوعه تحت الشمس و بتشحد … !!! انا الصراحه  الناس اللي بالشارع اللي بطلبوا مصاري  من كترهم بطلوا يأثروا فيي. و كتير سمعنا قصص عن ناس جمعوا ثروة من الشحاده  فما بعطي!.بس هاي الحجه أعطيتها شوية مصاري .. ليش ؟؟؟

عشان  لما شفتها كانت الشمس كتير حاميه.. و انا ميته عطش و شوبانه خطر في بالي انو  شو بدو يقعدها هالقعده لولا انو في اشي مستاهل و اضطراري  عم تشحد عشانه  !! انو تقعد عالدرج بعز دين الشمس عشان شو ؟؟!! اكيد مش عشان تعمل ثروه!

الحاله تعبانه!

نظرا لانه يومي اليوم يستحق التدوين…. و انا مش جاي على بالي اكتب.. حكيت بكتب تويتاتي عن الموضوع هون لبين ما ادونهم….

كيييفكم صحيح؟؟ و الله اني اشتقت اكتب اشي بس زمان ما صار اشي ينكتب معي.. 🙂

الحمدلله كان يومي جميلا … رحت على مدرسه بطوباس عشان تعليم المعلمين كمبيوتر ‎#Tubas‏ ‎#Nablus‏ ‎#Palestine‏ ‎#elearning‏ ‎#math‏ ‎#voluntaryWork

 اول مرة بروح على طوباس ….
بس و الله الوضع المعيشي للاستاذ بالتربية و التعليم لازم يكون احسن من هيك… يعني الاستاذ اكتر اشي لازم ابدوله تهتم فيه ‎#education‏ ‎#palestine
لازم الاستاذ يعطي الماده من قلبو و يكون بحب التدريس عشان ينتح الطلاب و هاد الاشي صعب يصير اذا كان وضعو المادي مش ممتاز ‎#education‏ ‎#palestine
لفت نظري انو الجامعات بتشكي من انتاج المدارس .. و كذلك للمدارس تشكو من المدرسين خريجين الجامعات ‎#education‏ ‎#palestine
ثقافة التسلط والقمع و عدم الرغبه في التجديد عند الاستاذ و ثقافة البصم و حب العلامه عند الطلاب لازم تموت ‎#palestine‏ ‎#education

@abo_shqran‏ طوباس مدينة فلسطينيه كانت قرية صغيرة كبرت و صارت محافظه .. تسلم رحت و رجعت ‎:-)‏

 (في ناس ما بعرفو طوباس عرفتهم عليها) 🙂
@Rajaa_Hatem‏ و الله يا رجاء بدي دروس خصوصيه لانو راتبو ما غم بكفيه …
الاستاذ مظلوم
تغيير ثقافة جيل اشي صعب بس مش مستحيل. ‎#education
اصلا الهم اللي بوحوه الاساتذه بقتل الابتكار و التفكير و الحيويه عند الطلاب ‎@Rajaa_Hatem
تخيلوووو منهاج الانحليزي البنت اللي اسمها فاطمه )عربيه(بتعمل الاشياء الخطا و البنت اللي اسمها ميري ) اجنبيه( بتصلح لفاطمه اغلاطها ‎#education
عدم الثقه بالنفس الموجود عنا بخوف .. حتى لما نضرب مثال لاشي منيح منفرض انو غيرنا المناح مش احنا عشان احنا بنظر حالنا متخلفين ‎#education
عدم الثقه بالنفس الموجود عنا بخوف .. حتى لما نضرب مثال لاشي منيح منفرض انو غيرنا المناح مش احنا عشان احنا بنظر حالنا متخلفين ‎#education
و في كتير اساتذه عندهم استعداد يدرسو و يطورو بس حمل الشغل اللي عليهم ما بعطيهم مجال ‎#education‏ ‎#palestine
من الحلول ييجي وزير تربيه و تعليم جريء يحكي علملآ انو الاستاذ صانع الاجيال لازم وضعو يتحسن اكتر من الوزير نفسو ‎#education‏ ‎#palestine
الخلاصه انو الحاله تعبانه يا ليلى ‎#education‏ ‎#palestine

#palestine #occupation عمتي و الاحتلال !

 

عمتي تزوجت بسنة 1967 و سافرت على الاردن

بعد شهر شهرين صار احصاء للفلسطينيين و هي كانت بره فما انحصت انها فلسطينيّه…(طبعا ما كانو ماخدين الموضوع جد على اساس انو اليهود مش مطولين)

و هلأ هي ما معها هويه فلسطينيّه “قصدي اسرائيليّه”  ما معها لم شمل… فما بتقدر تفوت الضفه… الا عن طريق السفارة الاسرائيليّه بالأردن…

طول الفتره اجت مرات كتير قليله عشان ما بتحب ينختم جوازها بفيزا اسرائيليّه … “من مبدأ و طني ما كانت تيجي”

كانو تيتا و سيدو و احنا نطلع عندها …

هلأ… تيتا شوي تعبانه ما بتقدر تسافر…. و عمتي بدها تشوفها و تشوفنا… اضطراراً قدمت على السفاره الاسرائيليّه من اكتر من اسبوع و لسّا بتستنى  يتكرمو عليها و يسمحولها تفوت على الضفه….

و عشان تطلع الفيزا عملو معها مقابله يمكن نص ساعه ما بقي  سؤال الا سألوها ياه…. عن عيلتها و عن ولادها و عن اخوتها… و ليش جاي..و شو بدها…. و كم بدها تقعد…

الله يلعنهم و يحرمهم كل شي حلو بحياتهم اللي عم بحرمونا من وطنا..

و لسا  الفيزا ما طلعت… و الله اعلم تطلع و لا ما تطلع….!

 

ادعولي شغلتين ..

الله يشفي تيتا و ترجع منيحه زي قبل و أحسن.. =)

تطلع الفيزا لعمتي .. كتير كنا متأملين انها تطلع بس كتير طولت و لسا مش رادين جواب)

 

 

 

علمولي هالبشر يبتسمو بس الصبح..

همووم الدنيا كتير … بعرف…

الشغل مقرف احياناً ..بعرف…

المشاكل اكتر من ساعات النهار…برضو بعرف

بس انا شو خصني تحكيني بنشافه  و تكشري بخلقتي على ساعة هالصبح !!! هو فش حد عندو  مشاكل غيرك ياا…ما انا اللي فيي مكفيني  (هاي موظفه اضطريت اروح اجيب منها شغله الساعه 8 و عشره  الصبح)

الحمدلله الحمدلله الحمدلله انو شغلي مع طلاب مش مع موظفين… لما اتضر اتعامل مع موظفين بكتشف قديش الحياه بشعه معهم بشعه (باستثناء ربا و كم حدا ) :d

كل واحد بفكر حالو فش حد غيرو مهموم… و كأنو وضعو أسوأ وضع بالعالم….. و كأنو بحكيلك  ” فوق مما انا مداوم انت كمان جاي تشغليني”

لو الموظف العربي يتعلم يبتسم بس بالفتره الصباحيّه على الأقل….

الله يعينا و يعين العالم على همومها….

تحياتي.. 😉

 

 

 

عصير الفراوله و الموظف المبتسم

نزلنا قبل شوي نشتري من الكافيتيريا عصير فراوله.. تفضلو كتير زاكي..:d

بس التدوينه مش عشان العصير ..عشان اللي باعنا العصير.. 🙂

كان بطل التدوينه واقف على الكاونتر بستقبل الزبون بابتسامه غير معهوده من موظف في العالم العربي وطلبنا انا و ربا كاستين عصير بس خلّص عصير الفراوله و هو بصبلنا,  فراح يعصر فراوله حطها بالخلاط و هي بتخلط راح على آلة عصر الجزر دخل شي عشر جزرات مع بعض… (عصر الجزر بتعّب) … و الموظفين التانيين بتحدثو مع الزباين..

بعدين و احنا واقفين اجا واحد بسألو عندكم عصير كيوي؟ حكالو عنا جزر و كيوي و برتقال و فراوله و شو بدك منخلطلك…اي اشي بتلاقي عنا.. ( بعمل دعايه للكفيريا كأنها لأبوه)

بعدين خلّص العصير… زبط الكاسه  و سكّرها و ابتسم و أعطانا ياها..

نعم صدّق أو لا تصدّق موظف في العالم العربي  … مبيتسم و بشتغل عن عشره  و شكلو  بحب شغلو كتير  … 🙂

التأثيرات الجانبيّه للشغل,,

شكلي كتير صرت اشوف ناس لدرجة بطلت أركّز بالأشكال !!!!!!!!!!!!!

مبارح وقّفت عندي بنت كنت أحكي معها كأني اول مره بشوفها و هي تسألني كيفك و شو أخبارك و بعرفش شو كأنها بتعرفني من زمان و بتطمن عني,,, حطيتها بموقف محرج من دون قصدي عشان كنت مستغربه…

هلأ قبل شوي أجت عندي بنت تسألني عن شغله فكرتها البنت اللي مبارح شفتها قلت أصلّح موقفي و أتحدث معها عشان مبارح حسستها انو انا مو عارفتها

بس واضح انها طلعت مش نفسها…يعني انا اللي انحرجت !!!!! بتكون راحت و هي تحكي من وين بتعرفني هاي !

ماجي فرح..أنا بكرهك…عن جد بكرهك..

مين أنت  اللي تقرري انو سنة 2011 مش سنتي…!!!! شو كاينه حضرتك؟؟؟

لا والظلم أنو أنا ما بحضرك انتي و لا اللي زيّك عشان حرام..و عشان بخاف أعرف المستقبل…. بس طلعتي موضوع الموسم…!!!

كنت قاعده مع ماما و صاحبتها (برجها زيي) و لّا خالتو بتحكيلي “يمامه 2011 مش سنتنا عشان برجنا داخل فيو زحل…!!!”

عصبت و حكيتيلها ماا بحب حد يحكيلي اشي عن الابراج….!!

بعد ساعه أنا و أخوي بالسيّاره فجأه زيد بحكيلي “يمامه يا حرام انت شو بستناكي  بهاي السنه” حكيتللو شو بستناني؟ حكالي مبارح  حضرت ماجي فرح حكو أنو أسوأ برج برجك عصبت عليه لأنو عن جد ادّايقت…!!!

شووو هاد؟؟؟ كييف يتفاولو علي هيك من وحده غبيّة زي هاي؟؟؟؟

لأ بعدين “مزح, احنا ما منصدق”

أرحموني اذا ما بتصدقو ليش تسمعوها…!!!

أن شاء الله رح تكون أحلى سنه بحياتي…و كل شي بدي ياه بصير زي ما بدي و أكتر….:)

و 1\1\2012  بكتب مدونه بثبت فيها انك كذّابه و 60 كذّابه…… أنا بعرف انك هيك بس عشان افرجي الناس

و كمان الكل بتهااون بالموضوع… التنجيم حرام حتلى لو ما صدقناه مع انو كل اللي بقرؤو أبراج (ما بقصد اللي بقرؤوا عن الشخصيات بقصد اللي بقرؤو عن المستقبل) بضحكو على حالهم لمَا يحكو ما منصدق… لانو بينهم و بين حالهم بكون أثّر فيهم و هم أكتر ناس عارفين….!


قال رسول الله صلى الله عليه و سلم “من أتى عرافا فسأله عن شيء لم تقبل له صلاة أربعين ليلة” صحيح مسلم

قال رسول الله صلى الله عليه و سلم “من أتى عرافا أو كاهنا فصدقه بما يقول فقد كفر بما أنزل على محمد”

الفرق بين الحديثين انو الاول من اتى مش من صدّق…!! بس “من اتى “يعني جرب بس ما صدّق….!!!

و بمناسبة السنه الجديده كل سنه و انتو سالمين… يارب بتكون سنة خير على الكل … 🙂