اقسام الناس بالفلانتاين !

KONICA MINOLTA DIGITAL CAMERA

شكلي اول مره انا بشهد الفلانتاين في عصر الشبكات الاجتماعيه ؟؟؟ !!!

مظاهر الفلانتاين على الفيس بوك و تويتر انقسمت هيك…

1. ناس بحتفلو بعيد الحب و نازلين يحبو في بعض  بطريقة بضحك  our love cake mn 7abeebee  o my valentine gift o thank you 7ayatii 3l sahra al 7elweh …thxx my love for the beautiful night   و الى آخره

2. ناس بتلطم على حالها  انهم مش مرتبطين !!  و عن جد بشكو و ببكو و بتحزونو

3. شيوخ نازلين بوستات  بحرمة هذا اليوم و انه نسبه للقديس فلانتاين  (قصة القديس فلانتاين  قراتها 90 مره من  مبارح  لليوم ببوستات  مكتوبه  ضد هذا العيد )

4.وطنيين ! دخّلو الاسرى و الشهداء و الدم و الاحتلال بالفلانتاين و انه كيف يعني انتو بتحتفلو بالفلانتاين و فلسطين لسا محتله كييف اه؟؟ مثلا خدولكم هالبوست ” عذرا للفلانتاين فورودنا لا تذهب الا لقبور شهدائنا ” نوووو كومينت !!!!!

5 . ناس متلي هيك عم  بتخوتو على الناس شو عم تعمل ..

بس هو الصراحه كلنا عملنا من الفلانتاين اشي  و احنا مندعي انه مش سائلين فيه ..

طيب انا مبارح تذكرت انه اليوم الفلانتاين من ستيتس هيك  ”  أعزائي وعزيزاتي الحبيبة …بسلم عليكم سامر العيساوي …”

الحمدلله اللي تذكرت كان راح علي…

ملا الله بالمحبه ايامكم و كل فلانتاين و انتم الى الله أقرب .. ! 🙂

بث مباشر لصلاة التهجد

السلام عليكم … و رمضان كريم

بدي احكيلكم عن شغله للي ما بقدرو يروحو قيام ليل على المسجد انو في  بصفحة عمرو خالد   كل ليله من ليالي العشر الاواخر لينك يوتيوب بوديكم على بث مباشر لقيام الليل من مصلى في بيت …

“اليوم هو رابع أيام العشر الآواخر من خير ليالي العام، فيها ليلة خير من ألف شهر، فاللهم اعنا فيهن على القيام وتلاوة القرآن.
شاهدوا وتابعوا معنا يومياً صلاة التجهد ودرس ديني يلقيه الدكتور عمرو خالد ثم دعاء الوتر قبيل الفجر، يومياً وحتى نهاية رمضان.. ويؤم المصلين في صلاة التهجد القارئ أحمد الحداد، الحاصل على المركز الأول على مستوى العالم الإسلامي في حفظ وترتيل القرآن الكريم”

الساعه  am 2:30 بتوقيت مكه-فلسطين  بكون في درس نص ساعه تقريبا بيحكي فيها خواطر قصيره رائعه جدا و يختم الدرس بدعاء.

انصحكم بمتابعته .. الدعاء مؤثر جدا ..

تقبل الله طاعتكم… و جزى الله الدكتور عمرو خالد عني كل خير

فكر قبل ما تشارك المعلومه Think before sharing

دفعني لكتابة هاد الموضوع اليوم عبارتين منتشرين على الفيس بوك بطريقه  مش معقوله !!!  بستغرب كيف الناس بتنشر هاي الاشياء من غير ما تفكر… طيب يفكرو بنقطه انو  لو حد مش مسلم قرأها بضحك على الاسلام و المسلمين.!

الاولى

هل تعلم..؟؟
-اذا امسكت “المصحف”

فإن الشيطان … “يغضب”

وإذا فتحته … “يبكي”

وإذا قلت بسم الله … “ينهار”

فإذا أخذت في القرآءه … “يقع مغشي عليه”

وهل تعلم أنك إذا حاولت إرسال هذه الرسالة لأحد …

سيحاول الشيطان … “منعك”

الثانيه
ھل تعلمـْ لمآذآ نُحس بـآلضيق فيْ بعض آلـأحيآن دونَ سبب ؟!

ھُنـآك غِشـآء يسمىْ { آلرآن }
يأتِي عندمآ ننسَى ذكْر الله سُبحـآنه وتعـآلىْ
فنبدَأ بعَمل آلذنوبْ وآلـأحسَـآس بـآلضِيق وآلحُزن

قَـآل تعـآلىْ : { كَلـآ بلْ رآنَ علىَ قُلوبِهمـ مـآكآنُو يكسِبون }
فـَ يبدأ هذآ آلغِشـآء بِـآلتلـآشِيْ عند ذكره عز وجل

انا مش مفتيه و لا شيخه و لا بفهم بالدين اكتر من غيري بس عندي عقل!!!!
يعني بالنسبه الي العباره الاولى ساوت الاسلام مسخره…!!! شو الشيطان يقع مغشي عليه…!! لسا و الله من فتره قرأت وحده بتشبهها “اذا فتحت القران الشيطان بصير راسو يوجعو”
اكيد اكيد اللي بنشرها نيتو سليمه و نيتو يشجع على قراءه القران بس في كتير احاديث صحيحه عن فضل و عظمة قراءة القرآن ما في داعي ننشر هاي الاشياء!
اما الثانيه
فبخترعو معلومه خاطئه بحطوها بقالب علمي  برضو باعتقادي ما الها اساس من الصحه بعتبرو انو بدهم يثبتو اعجاز القرآن فيها… القران كتاب معجز بدلائل علميه و عقليه واضحه…. شو في داعي للاختراعات و الزيادات!!!
هل الران غشاء! يعني الكفر اذا مات قلبو ملفوف بغشاء الران و المؤمن مش ملفوف في الران؟؟ مين حكالهم ؟؟ شو الدليل ؟؟ كل حد فينا مدايق لما يذكر الله برتاح هاي شغله روحيه “الا بذكر الله تطمئن القلوب” بس هل السبب انو قلبو لفو غشاء؟؟؟؟
ب
فكر و ابحث و تحقق قبل ان تنشر خاصه بامور الدين ….
حتى لو نيتك سليمه ..نشر معلومات خاطئه لتقريب الناس من الاسلام او من الطاعات و العبادات… اشي لو كان الرسول صلى الله عليه و سلم بينا اكيد ما كان شجعو…. و اكيد هاد اشي حرام لانو خطاً  !
اذا حد عندو دليل على  صحة اي اشي من هدول  المعلومتين يا ريت يحكيلنا

يا ليتني اكون معهم ..

السنه الماضيه  الحمدلله عملت عمره.. كانت اول مره بزور فيها الحرم المدني و المكي..

لما شفت هاي الصورة على الانترنت اتذكرت انو اكتر مكان كنت احب اقعد فيه و هو هاد محل ما هم قاعدين…

لو ضليت عشر ساعات سرحانه بشكل  الكعبه و الناس اللي بطوف  ما بزهق…  و احنا  لما رحنا كانت صيف كان  بالليل يبقى هدوووء ما في عجقه و ناس عشان الاغلب تحت عم بطوفو انا كنت  احب اطلع هون اتفرج عليهم…

و هلأ كنت احضر برنامج لمضطفى حسني اسمو “يا ليتني كنت معهم” (مع الحجاج) … عن جد يا ليتني اكون معهم!

البرنامج كتير فكرتو حلوه بنصحكم   تحضروه هاي مواعيده  🙂

 

و هاي اول حلقه

 

يا رب يا كريم اكرمنا بحج و عمره باسرع وقت كمان كتير مرات..

اللهم لا تجعله آخر عهدي ببيتك..

الناس بتفكر المال الحرام بس بيجي من السرقه و مصاري الربا..

الناس بتفكر المال الحرام بس بيجي من السرقه و مصاري الربا.. اللي بشتغل ببنك بطلعوه من كفار قريش… و هم بكونو اساتذه و أطباء و مش قايمين بنص الواجب اللي مفروض عليهم … (الله يبعد عنا اي مال مشبوه و يسامحنا على تقصيرنا  )

بكون استاذ مدرسه مش مكلف خاطرو قبل الحصه يحضر شو عليه..

او دكتور عم بجرب بالمريض كأنو المريض جهاز كمبيوتر مش كأنو بشر…

هم ما بعرفو انو اذا انت بتشغل شغل و ماخد عليه راتب اذا ما اشتغلت شغلك زي ما لازم تشتغلو بكونو مصاربك حرام… حتى لو كان راتبك قليل .. و حتى  لو كنت بتشتغل شغل بتستاهل عليه أضعاف راتبك… مجرد  انك قبلت بهاد الشغل فواجبك تشتغلو كلو زي ما هو .. و زي ما انت قبلت فيه … يا اخي مش عاجبك راتبك ببساطه استقيل .. !

يا أمة محمد … الصومال تستغيث …!

لا اله الا الله…..نصوم على أمل أن نشعر بهم…..فلو صمنا دهراً كصيامنا هذه الايام لن تشعر الامة الاسلامية مجتمعة بجوع طفل منهم … استغفر الله العظيم من كل ذنب عظبم…..!

مأساه .. ! البؤس بعيون الاطفال لا يوصف .. وينهم منظمات حقوق الانسان و حقوق الطفل و اليونيسف الابصر شو التانيين !! بدل ما ييجو يشفقو علينا بنشاطات ترفيهيه في ناس اولى منا

الفيديو بقشعر البدن….و العرب بفكرو  ببرج جده اللي بدو يكلف بعرفش كم مليون عشان يكون اطول من برج خليفه!!

لا حول و لا قوة الا بالله

ثورات الشعوب جائزه الّا في السعوديّه فهي حرام شرعاً..!!!

مبارح كنت أحضر “انت تسأل و المفتي يجيب” على أحد القنوات الفضائيّه….

شيخ معروف الناس بحكو معو تلفون بسألو أسئله فقهيّه و بجاوب كنت منسجمه معو لعند ما حد حكى و سألو هاد السؤال

“هل الخروج في ثورات ضد الحكام جائز”

شو جاوبو  ” أذا كانت الثورات دون موافقة الوالي..و كان الوالي يحكم بشرع الله”كما هو الحال في المملكه العربيّه السعوديّه” فلا يجوز , أما في حالة الظلم و الاستبداد و عدم تطبيق شرع الله  فهذا جائز….

يعني كأنو بدو يحكي هيك ” اذا الدوله فيها الأذان بأذن,,,و الصلاه تقام…و السارق بتنقطع ايدو… و كل ا لحدود معمول فيها… حتى  لو الشعب مش واصلو حقوقو لا تجوز الثوره…. و كأن ثورة تونس جائزه فقط لان زين الدين العابدين كان يمنع الاذان في المساجد و ليس للفقر و الظلم و الاستبداد الاجتماعي

طبعاً الأخ الله أعلم شو السياره اللي بسوقها و وين القصر اللي عايش فيه…و يمكن يكون بصلّي بالحرم بالصف الأول…

أنا بعد زيارني للسعوديه في العمره بشهد انو “خادم الحرمين الشريفين” مو مقصر من ناحية خدمة الحرمين يعني  و الله الخدمات اللي عاملها بنشكر عليها…

بس أوّلا..هاد واجبو..

ثانيّاً… هم المصاري مصاري أبوه..

ثالثاً… ما حد مقصر معو بالشكر و المدح و الثناء والنفاق… يعني ةمش خسران اشي بخدمة الحرم و على العموم جزاه الله خيراً و كتّر خيرو…

بس أكتر اشي مستفز انو السائل “ما حدد منطقه معيّنه يعني ممكن يخلي جوابو هيك ” أذا كانت الثورات دون موافقة الوالي..و كان الوالي يحكم بشرع الله  فلا يجوز , أما في حالة الظلم و الاستبداد و عدم تطبيق شرع الله   فهذا جائز….

مش مضطر ينافق أبداً…