طلعنا على الحرية …

 

اليوم   كان يوم  انتصار في مسيرة شعبنا الفلسطيني(يوم من الايام اللي زمان كتير عنها )…  فرحت و رقصت فيه الضفه و غزه…حماس و فتح….. ما في فلسطيني اليوم كان مش مبسوط   …تحرر  الف اسير  بصفقة تبادل مع شالبط… انجاز عظيم و الله .. خاصه انو ما ضل ولا سجينه عند الاحتلال ….  عقبال باقي الاسرى يا رب …

شفت بالاخبار كيف الاهل بستقبلو ولادهم اللي مش شايفينهم من سنين  و اللي محكوم عليه 10 مؤبدات.. و اللي انسجن و ابنو مش مولود طلع شافو شب .. قصص و حكايا و مآسي ما بعرف فيها غير ربنا و صحابها….

يمكن  اليوم سمعت اغنية فيروز عن الحريه يمكن 5 مرات و را بعض كل ما تخلص اعيدها  ”
طلعنا على الضو طلعنا على الريح طلعنا على الشمس طلعنا على الحرية…..يا حرية يا زهرة نارية يا طفلة وحشية يا حرية….”

ضو ..و ريح … و شمس…. يا الله كانو محرومين من الطبيعه  بالاضافه لكل المحرومين منو…!

الله يهنيهم بحريتهم و ما اضيع ارضنا و ترابنا اللي قدمو سنين عمرهم على شانها…

اكتر اشي بوجع القلب انو لسا في كتير اسرى بالسجون.. اكيد فرحتهم بخروج اخوانهم كبيره بس غصتهم و حزننهم انهم مش معهم اكبر…

مبروك للجميع، وعقبال ما نحتفل جميعاً بتحرير فلسطين كامله شبر شبر... الله كريم :)

رأيي في اعلان دولة فلسطين او دولة “ايلول”

بصفتي أحد أبناء الشعب الفلسطيني العظيم… و لانو كل الناس مبلوشين بالدوله المنتظره…و لاتو اللي بحكي مش فارق معو صار عند كتير ناس خارج عن الصف الوطني لازم اعبر عن رأيي.. 🙂

اولا … الاشي اللي بحزّن انو الاساس في دوله اسمها فلسطين .. اجو ناس اغتصبوها عملو دويله سموها اسرائيل… شوي شوي الدويله الصغيره اندعمت من دول عظمى و كبرت على حساب الدوله الأصليّه… و هيك انقلب كل شي بنظر العالم كلو … و صارت الدوله الأصليه ..اللي تهجر شعبها .. و اغتصبت ارضها … بقعه من هالعالم ما حد شايفها و لا معترف فيها … و الدوله الظالمه اللي كانت لصلا اشي مش موجود.. كانت عباره عن و لا اشي صارت هي الاساس .

بالنسبه للشعب الفلسطيني و العالم العربي الحر “المفروض” انو مصطلح اسرائيل اشي غير مستخدم … مفروض حيفا و يافا و عكا و تل الربيع مدن فلسطينيّه مش عبريّه….. مفروض القدس تكون النا ….

بس عشان دايما الأقوى مؤثر أكتر من الضعيف العالم كلو تأثر بالاقوى و اعترف باسرائي كانها هي الاساس و صار الفلسطينيين يترجو في الدول وحده وحده “من شان الله اعترفو فينا ” … الدول العاديه كلها اعترفت فينا بمية بوسة ايد.. سامعين بدوله اسمها “بشكيريا” .. (انا سمعت جديد) رحنا عندها و ترجيناها تعترف فينا و الحمدلله بفضل الله اعترفو فينا …

و كل الدول التانين اعترفو فينا بس ضل الدول العظمى اللي بفيتو واحد بالامم المتحده بتسقط لآراء 190 دوله… !

بالاعتماد على ميزان القوى رأي اميركا = رأي 190 دوله …

و مش تفكرو اللي اعتررفو فينا اعترفو فينا كدوله كامله… لا اعترفو فينا على حدود ال 67 .. كيف يعني؟؟ يعني بس الضفه الغربيه , قطاع غزه (المحاصر) … القدس الشرقيه ..

اما الاوضاع في أقسام الدوله الثلاثه ..

الضفه الغربيه ... ارضها الدوريات الاسرائيليه بتفوتها ايمتى ما بدها و الاعتقالات “الاسرائيليه فيها شغاله كل ليله تقريباً…جزء كبييير منها مستوطنات ..جوها الزنانات (الطيارات) ايمتى ما بيجي على بالها بتزورها … بحرها (فش فيها بحر عشان البحر مع الجزء اللي مش معترف فيه )

غزه.. و ما أدراك ما غزه … دويله من الدويله .. حتى و الله ما اتا عارفه هي داخله بالاعتراف و لا لأ … بس اللي بعرفو انو اهل الضفه ما بقدرو يسافرو على غزه و اهل غزه ما بقدرو يسافرو على الضفه … و اهل غزه لما بدهم يسافرو على مصر بدهم اذن و موافقه و تصاريح… و لما فلسطيني غزه بدهم يشوفو اهلهم من فلسطينيين الضفه بشوفوهم بالاردن او بمصر .

. اما القدس فسلامتكم و تعيشو ..عليه العوض و منو العوض … مش طالعلنا نشم ريحتها … متنا برمضان عشان يطلعلنا زياره على الاقصى و ما طلعلنا… بدهم 100 الف شرط عشان يطلعولك تصريح.. “و مين هدول اللي بسمحو و ما بسمحو ؟ دولة اسرائيل جارتنا” …

انا بالنسبه الي في هالوضع بس فارق معي الاستقرار الداخلي يعني اذا اعترفو بالدوله و ما صار اشي داخليا من زيادة استيطان او هجوم عسكري اسرائيلي .. يعترفو مهو مش متغير اشي… (مع انو هو تنازل رسمي منا عن فلسطينا المحتله) .. يعني كنا متنازلين مش رسميا صرنا متنازلين رسميا ..

اما انو نتيجة الاعتراف بالدوله يصير في انتفاضه و ياخدوها اليهود حجه عشان يفوتو و يعتقلو و يعملو مجازر… فعنها ما كانت هيك دوله اللي فش فيها و لا مقوم من مقومات الدوله !

 

يا أمة محمد … الصومال تستغيث …!

لا اله الا الله…..نصوم على أمل أن نشعر بهم…..فلو صمنا دهراً كصيامنا هذه الايام لن تشعر الامة الاسلامية مجتمعة بجوع طفل منهم … استغفر الله العظيم من كل ذنب عظبم…..!

مأساه .. ! البؤس بعيون الاطفال لا يوصف .. وينهم منظمات حقوق الانسان و حقوق الطفل و اليونيسف الابصر شو التانيين !! بدل ما ييجو يشفقو علينا بنشاطات ترفيهيه في ناس اولى منا

الفيديو بقشعر البدن….و العرب بفكرو  ببرج جده اللي بدو يكلف بعرفش كم مليون عشان يكون اطول من برج خليفه!!

لا حول و لا قوة الا بالله

63 سنه من الاحتلال…

زهكت اشوف احد بعمري يذل ابوي على محسوم
زهكت انو في اكتر من 7000 اسير في السجون الاسرائيليه و العالم كلو بتطلع على شاليط
انا زهكت من 63 سنه تحت احتلال

63 سنه و الحبل جرار… الله يفرجها بس ما اتوقع رح تفرج و تتحرر بزمانا …!!

ما في و لا اشي عملي او ملموس بخلي الواحد يتفاءل الا الامل بالله  …لا اله الا الله..

وائل غنيم في العاشرة مساء…

مقابله تستحق  التدوين… بس ما عندي كلمات توصف اخلاصو و حبو لمصر …

ما تفوتو عليكم المقابله… لمّا تشوفوها بتحسو انو لسّا الدنيا بخير…

و لسّا في ناس ناجحين بحياتهم و عندهم هدف كبير مش محصور بس بمصلحتهم الشخصيه و حياتهم و استقرارهم…..

“وائل غنيم : دي ثورة شباب الانترنت اللي بقت بعد كدّ ثورة شباب مصر ”

..انا آسف بس دي مش غلطتنا …دي غلطة كل واحد ماسك في السلطة ومتبت فيها

سجّل يا تاريخ….

في مثل هذا اليوم سجل التاريخ قطر كأول دولة عربيّة تستضيف كأس العالم …. و اميركا اصيبت بخيبة أمل كبيره…..

و طلع اوباما ما عندو روح رياضيّة -بس احنا أول مره منعرف عشان اول مره العرب بنتصرو على الاميركان- هيو بحكي انو قرار الفيفا خاطئ….!!!!!!

حزين اوباما مش مستوعب الهزيمه!!

انا اول اشي فكرت فيه لما اخدت قطر هذا الشرف العظيم انو 2022 بكون انا عمري 35 اذا كنت عايشه…! يعني 5 سنين و بصير 40…كتير و الله..!

و كمان يا تاريخ سجل هاي …صارت في هذا اليوم التاريخي اللي انتصرنا فيو على اميركا….

قتل 40 سجّاناً من جنود الاحتلال الصهيوني اليوم الخميس في حادث احتراق حافلتهم، التي حوصرت وسط ألسنة اللهب الهائلة، على الطريق المؤدية لسجن “الدامون” الصهيوني

يا لطيف…!!!!!!

اذا صارت أحداث تاريخيّه من هون لأقبل ما أنام بسجلها..:d

ذكرى شو اليوم؟؟؟

اليوم الذكرى الثالثة والتسعين لوعد بلفور….

سيدي الله يرحمو أول الاحتلال كان يضل يحكي “ليش هم اليهود مطولين!!!!”

بابا  لسا بتذكر…

حرام مات قبل ما يطلعو…!!..

أنا لمّا قرأت تذكرت انو اه و الله 2\11 أخدنا بالمدرسه انو وعد بلفور.. و لسّا  مبارح بحكي يااي شهر 11 في عطلة عشان عيد الأستقلال…!!!!!!!!!!!!!!!!!!! بحسب للأستقلال اللي منحتفل فيه بلا ما ييجي ..! (و الاجازه يمكن تروح مع أجازة العيد)

نص وعد بلفور..

عزيزي اللورد روتشيلد،
يسرني جداً أن أبلغكم بالنيابة عن حكومة جلالته، التصريح التالي الذي ينطوي على العطف على أماني اليهود والصهيونية، وقد عرض على الوزارة وأقرته:
“إن حكومة صاحب الجلالة تنظر بعين العطف إلى تأسيس وطن قومي للشعب اليهودي في فلسطين، وستبذل غاية جهدها لتسهيل تحقيق هذه الغاية، على أن يفهم جلياً أنه لن يؤتى بعمل من شأنه أن ينتقص من الحقوق المدنية والدينية التي تتمتع بها الطوائف غير اليهودية المقيمة الآن في فلسطين، ولا الحقوق أو الوضع السياسي الذي يتمتع به اليهود في البلدان الأخرى”.
وسأكون ممتناً إذا ما أحطتم الاتحاد الصهيوني علماً بهذا التصريح.
المخلص
آرثر بلفور
لاحظو..على أن يفهم جلياً أنه لن يؤتى بعمل من شأنه أن ينتقص من الحقوق المدنية والدينية التي تتمتع بها الطوائف غير اليهودية المقيمة الآن في فلسطين..
علوعد يا كمّون..!!!!!