يوم في القدس

مبارح  رحت على المسجد الاقصى و على قبة الصخرة .. و عكنيسة القيامه و على مسجد سيدنا عمر … الحمدلله بعد فضل الله و تكرم سيادة دولة اسرائيل علينا طلعلنا تصريح زياره للقدس.

آخر مره كنت زرت القدس كانت برمضان ال 2008 .. وقتها كان في تسهيلات اسرائيليّه و كل الناس راحوا و كان كل شي كتير مليان , و قتها ادايقنا من الزحمه و العجقه كل الناس فوق بعض كانت , حتى ما كان في مكان نصلي جوة الحرم صلينا بساحاته.

هاي المرة بالعكس تماماً … كل شي اسلامي فاضي .. المسجد الاقصى كتير كبير و كتير فاضي  و كتير حزين ….بصلاة العصر يمكن كان صفين رجال و صفين ستات و مش كاملين.

المسجد الاقصى كيف فاضي

المسجد الاقصى كيف فاضي

رحنا زيارة على كنيسة القيامه … بالنسبه الي شفتها كانها متحف بزغول العيون من تغير الاضاءات من مكان للتاني.. مرة فضا و مره ضوء خفيف و مره ضوء شموع … بس بناء رائع كل شي فيها تحفه من الصور للتماثيل للكراسي السقوف و الحيطان مزخرفه بشكل جميل جدا.

رجعنا من كنيسة القيامه على المسجد الاقصى انا اكتئبت من المقارنه …. كنيسة القيامه فش فيها مكان ندعس من كتر السياح الاجانب و الاقصى فاضي .. يحرمهم كل شي حلو بحياتهم اللي حارمينا اياه … كنت اتخيل انه لو انه الوضع طبيعي كان يمكن الاقصى هلا متل الحرم المكي الناس بتيجي عليه بالالافات يمكن كان كمان عملولو توسعه .

كنيسة القيامه من بره..لسا جوة اعداد اكبر من الناس

طريقنا الحمدلله اجمالا مسهّله … ساعه و شوي على حاجز قلنديا و مرينا… بس ايش الحاجز مأساه .. بعاملونا زي روس الغنم فيه   ! لسا احنا مرة بالسنه منمر عنه في ناس يوميا لازم يمرو منه منهم طلاب مدارس ساكنين بالرام و مدارسهم بالقدس.

هدول الحدايد اللي بنظمو فيهم دخول الفلسطينيين للقدس .. كل ربع ساعه بمر شوي ..

الفلسطينيين من اهل القدس هويتهم الاسرائيليه كنز بالنسبه الهم … لانها بتامنلهم تأمين صحي و تعليم و راتب تقاعد و امتيازات و لا بحلم فيه و لا مخلوق في اي بلد عربي … حتى الكبار بالسن اللي تجاوزو الستين بالاضافه  لراتب التقاعد بتيجي عندهم شغاله 3  مرات بالاسبوع بنظف كل اللدار و بتطبخلهم و بتعملهم كل شي بدهم ياه و بتروح  (معلومات صدمتني من خالة ماما اللي  ساكنة بالقدس )

من الاشياء اللي متغيرة عن زيارتي الماضيه انه اليهود السكناج (المتدينين اللي بربو سوالف شعرهم من الجنب) كترانين بطريقه رهيبه وين ما نروح نشوفهم بوجهنا و كل واحد معه مرته و اربع خمس ولاد كلهم زيه حاطين طاقيّه و عاملين سوالف .. و ستات عندهم محافظين بشكل ملحوظ بطريقة لبسهم   هو مبارح كان اخر يوم باعياد اليهود يمكن عشان هيك. و خالة ماما حكتلي انهم صايرين يسكنو يهود بحارات عربيه بالقدس الشرقيه فوين ما تلف وجهك في يهود.

و احنا بالطريق مر يمكن 100 يهودي بنص البلد القديمة بالقدس الشرقيه و صارو يغنو و يحتفلو .. هاد الفيديو الصغير صورته

ابواب القدس و اسوارها و اقصاها كلها اشياء كتير حلوة و انت فيها بتكون بتحس حالك بتحلم … انه انا عم بصلي بمكان كل المسلمين نفسهم يوصلو و مش طالعلعم !

صلينا العصر بالاقصى و رحنا عشان نتغدا و نلف شوي بالبلد القديمه و نرجع نصلي للمغرب بس للاسف الوقت سبقنا و اذن المغرب و احنا بعاد عن الاقصى صلينا بمسجد اسمه المسجد الادهمي و روحنا من غير ما نودع  الاقصى …

الى اللقاء قريباً ان شاء الله

3 thoughts on “يوم في القدس

  1. thx 4 the (journey)! shawagteena akthar o akthar ela ziyarah lel Quds al 7abeebah!😦

    not to cry upon the past per se but sayyidna Omar`s treatment is way much drastic and human than how our brothers and sisters are being treated!
    😦

  2. أحرامٌ على بلابله الدوح ،،، حلال للطير من كل جنس؟؟
    سياّح من كلّ بلاد العالم، و يهود بصلّو و بحتفلو … و نحنا مش صاححلنا ربع زيارة😦

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s