و طني عم يوجعني !ا

بعد موجة الغلاء اللي اجتاحت نابلس و فلسطين كلها .. صار في حالة اكتئاب عند الشعب

بطل حد همه الارض و الوطن و القدس و كامل التراب الوطني  … الله معهم راحو زمان (ما حداش يحكيلي ما راحو لانهم راحو عاد ايمتى برجعو مش عارفه)

اصلا الواحد اذا ما معه ياكل و ما معه يركب تاكسي بدو يكون معه وقت يفكر باسترجاع القدس ؟؟!

لما كيلو البندوره ب 8 شيكل (دينارين الا شوي )

و كرتونة البيض ب 20 شيكل (4 دنانير)

و لتر البنزين ب (8  شيكل)

المستشفيات الحكوميه اليوم وحده بعرفها راحت على الطوارئ بمستشفى حكومي بنابلس  بلاوي مواطنين بستنو دورهم و كل اللي واقفين عليهم دكتور واحد و ممرضه وحده  !

الموظفين… بدون استثناء …كله قرفان حاله …ظلم و ظلم و ظلم على كتير موظفين , كم واحد معهم مصاري بستعبدو الخلق…و الله مبارح شفت صاحبتي بتشتغل من ال 8 الصبح لل5 المسا بشركة  شغلها تدخيل بيانات على مواقع و هيك … فبسالها انا “كيف شغلك؟ ” حكتلي “زفت ” حكيتلها “خير؟ “… جاوبتني و الدموع بعيونها انهم بشتغلو من الصبح للمسا من غير ما يرفعو راسهم عن الشغل و آخر الدوام لما بدهم يروحو بيحكيلهم المدير “ليش انتو اشتغلتو اشي اليوم ؟ ” …. و كان مبارح لما شفتها الشهر 4\9 و لسا مش معطيهم راتب شهر 8 … مش هاد ظلم؟؟؟؟؟؟ اه نسيت احكيلكم راتبها بالشهر 800 شيكل يعني 150 دينار بس تخيلووو ..الله يلعن ابو الظلم

و الله مش من اشي قليل كل الشباب نفسها تهج … من القرف اللي عايشين فيه … بيحكولك اشتغل عشان تجيب مصاري… طيب مهم بشتغلو و ما بتقدروهم ..و ما باخدو حقهم و عندهم مصاريف و متطلبات حياه طبيعيّه مش قادرين يعملوها …. كيف بدهم ينجزو؟؟  و على الجانب الآخر من الوطن ناس بتوصلها رواتبها و هي في بيوتها حتى  ما في داعي  يتعبو حالهم و يشتغلو ….و اذا حابين يكملو دراسه بره برضو بتامنلهم يكملو باحسن جامعات و  بس يرجعو يستلمو أعلى المناصب….صح اشي بوجّع ؟؟؟

و تستمر الحياه  بالقرف بالزهق بالنكد بالغصب بالطول بالارتفاع بدها تمشي ….!

اخيرا انا دايما بحكي الف الحمدلله انه بالاخر بدنا نموت و نتحاسب  … و كل حق يرجع لصحابه  .. “و الظلم ظلمات يوم القيامه “

This entry was posted in غير مصنف by yamama. Bookmark the permalink.

4 thoughts on “و طني عم يوجعني !ا

  1. الحمد لله على كل حال و لكن أن يوجعك وطنك، و لهذه الدرجة فالأمر جلل.

    الله يسترنا جميعًا!

  2. الامر من زمان جلل… و الجرس دق زمان بس عم نعمل حالنا مو سامعين … عم نضحك ع حالنا بشبه الرفاهية اللي عايشينها الله المستعان … “لايغير الله ما بقوم حتى يغيروا ما بأنفسهم”

  3. يا الله شو بوجّع.
    يمكن احنا اللي برّة فلسطين مفكرين انه مشكلة الفلسطينيين هي بس في الاحتلال. طبعا الاحتلال مش سهل يرتبط بكلمة “بس” .. لما تكون كل حياتك معلّقة بقرار من عدوّك هاد أكيد مش “بس” و لما تحسي انك مش آمنة حتى وانتي في بيتك و لما كل يوم شهدا و أسرى و لما و لما … اللي لاحظته من الشغلات اللي قلتيها انه المشاكل اليومية الحياتية قاعدة بتأثر عالناس اكتر من الاحتلال!
    بعرف انهم الصهاينة همي السبب في كل هاد بس كمان الحمدلله وطننا العربي غني بأصحاب القرار و المسؤولين ذوي السجلات الطويلة العريضة من الفساد و النصب و استغلال المناصب … يعني مش محتاجين احتلال عشان يوجههم للانحراف.
    سدقيني الوضع في الاردن و كتير بلدان عربية مش كتير أحسن و لو كان أحسن بشوي فهو قاعد بنحدر بسرعة رهيبة.. الله يسترنا من اللي جاي و ياا رب يفرجها علينا جميعا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s