رأيي في اعلان دولة فلسطين او دولة “ايلول”

بصفتي أحد أبناء الشعب الفلسطيني العظيم… و لانو كل الناس مبلوشين بالدوله المنتظره…و لاتو اللي بحكي مش فارق معو صار عند كتير ناس خارج عن الصف الوطني لازم اعبر عن رأيي..🙂

اولا … الاشي اللي بحزّن انو الاساس في دوله اسمها فلسطين .. اجو ناس اغتصبوها عملو دويله سموها اسرائيل… شوي شوي الدويله الصغيره اندعمت من دول عظمى و كبرت على حساب الدوله الأصليّه… و هيك انقلب كل شي بنظر العالم كلو … و صارت الدوله الأصليه ..اللي تهجر شعبها .. و اغتصبت ارضها … بقعه من هالعالم ما حد شايفها و لا معترف فيها … و الدوله الظالمه اللي كانت لصلا اشي مش موجود.. كانت عباره عن و لا اشي صارت هي الاساس .

بالنسبه للشعب الفلسطيني و العالم العربي الحر “المفروض” انو مصطلح اسرائيل اشي غير مستخدم … مفروض حيفا و يافا و عكا و تل الربيع مدن فلسطينيّه مش عبريّه….. مفروض القدس تكون النا ….

بس عشان دايما الأقوى مؤثر أكتر من الضعيف العالم كلو تأثر بالاقوى و اعترف باسرائي كانها هي الاساس و صار الفلسطينيين يترجو في الدول وحده وحده “من شان الله اعترفو فينا ” … الدول العاديه كلها اعترفت فينا بمية بوسة ايد.. سامعين بدوله اسمها “بشكيريا” .. (انا سمعت جديد) رحنا عندها و ترجيناها تعترف فينا و الحمدلله بفضل الله اعترفو فينا …

و كل الدول التانين اعترفو فينا بس ضل الدول العظمى اللي بفيتو واحد بالامم المتحده بتسقط لآراء 190 دوله… !

بالاعتماد على ميزان القوى رأي اميركا = رأي 190 دوله …

و مش تفكرو اللي اعتررفو فينا اعترفو فينا كدوله كامله… لا اعترفو فينا على حدود ال 67 .. كيف يعني؟؟ يعني بس الضفه الغربيه , قطاع غزه (المحاصر) … القدس الشرقيه ..

اما الاوضاع في أقسام الدوله الثلاثه ..

الضفه الغربيه ... ارضها الدوريات الاسرائيليه بتفوتها ايمتى ما بدها و الاعتقالات “الاسرائيليه فيها شغاله كل ليله تقريباً…جزء كبييير منها مستوطنات ..جوها الزنانات (الطيارات) ايمتى ما بيجي على بالها بتزورها … بحرها (فش فيها بحر عشان البحر مع الجزء اللي مش معترف فيه )

غزه.. و ما أدراك ما غزه … دويله من الدويله .. حتى و الله ما اتا عارفه هي داخله بالاعتراف و لا لأ … بس اللي بعرفو انو اهل الضفه ما بقدرو يسافرو على غزه و اهل غزه ما بقدرو يسافرو على الضفه … و اهل غزه لما بدهم يسافرو على مصر بدهم اذن و موافقه و تصاريح… و لما فلسطيني غزه بدهم يشوفو اهلهم من فلسطينيين الضفه بشوفوهم بالاردن او بمصر .

. اما القدس فسلامتكم و تعيشو ..عليه العوض و منو العوض … مش طالعلنا نشم ريحتها … متنا برمضان عشان يطلعلنا زياره على الاقصى و ما طلعلنا… بدهم 100 الف شرط عشان يطلعولك تصريح.. “و مين هدول اللي بسمحو و ما بسمحو ؟ دولة اسرائيل جارتنا” …

انا بالنسبه الي في هالوضع بس فارق معي الاستقرار الداخلي يعني اذا اعترفو بالدوله و ما صار اشي داخليا من زيادة استيطان او هجوم عسكري اسرائيلي .. يعترفو مهو مش متغير اشي… (مع انو هو تنازل رسمي منا عن فلسطينا المحتله) .. يعني كنا متنازلين مش رسميا صرنا متنازلين رسميا ..

اما انو نتيجة الاعتراف بالدوله يصير في انتفاضه و ياخدوها اليهود حجه عشان يفوتو و يعتقلو و يعملو مجازر… فعنها ما كانت هيك دوله اللي فش فيها و لا مقوم من مقومات الدوله !

 

2 thoughts on “رأيي في اعلان دولة فلسطين او دولة “ايلول”

  1. والله يمامة ما انا عارفة شو احكي!! بس ازا صار اعتراف على هالوضع اللي ما برضي حدا اكيد ما رح تمر هيك .. انا برأيي نضل متنازلين بطريقة مش رسمية احسن .. عالاقل هيك حقنا بضل معلق لحد ما ييجي يوم الله يفرجها .. ما حدا بعرف شو ممكن يصير!
    اكيد انتو العايشين بفلسطين حاسين بالاوضاع و بتقدرو تتنبأو اكتر باللي ممكن يصير .. احنا يمكن ما النا حق حتى انه نحكي رأينا لأننا ما اتعرضنا لشي .. بس انا بعتبر حلمي بالعودة لفلسطين بعطيني شوية حق انه احكي و اتدخل بهالشغلات الي بسمع عنها بس في الاخبار!
    الله يفتحها علينا و عليكم يا رب ..

  2. مقال جميل ومعبر عن واقعنا المأساوي وعجبني أكثر إشي فقرة القدس عن جد إشي مأساوي …..
    بس عندي بعض المداخلات…..
    قلتي:
    ” يعني اذا اعترفو بالدوله و ما صار اشي داخليا من زيادة استيطان او هجوم عسكري اسرائيلي .. يعترفو مهو مش متغير اشي…”
    أنهو اللي قلك إنو ممكن اليهود يقبلو إننا ناخد منطقة –مش دولة- من غير ما يكون إلهم إيد فيها ؟؟!! هذا الفرض اللي بتحكيه مستحيل بل ألف ألف مستحيل يصير {يعني بلغة البرمجة يا IT :(الIf statement هاي مستحيل ينفذها البرنامج رح ياخد else طوالي يعني بتقدري تريحي حالك وتمحيها:( } بس في احتمالية وحدة انها تتنفذ بتعرفي إيمتى ؟لما يلاقو حدا ينوب محلهم بهالأشياء!!
    بعدين شغلة تانية ….
    مين فينا اللي بدوش دولة الواحد يكون عندو امن واستقرار فيها ؟أكيد ولا حدا
    وإحنا قابلين تكون الدولة على جزء من أرضنا الأصلية بس بشرط إنو ما نقول باقي الأرض إلهم وما إلنا خص فيها بل ومستعدين نتعامل معهم بصورة طبيعية جدا بصفتنا جيران
    مثال جميل بضربوه:
    كان عندك بيت كبير وإنتي مبسوطة فيه ووضعك تمام إجا واحد بليلة ما فيها ضو قمر وأخد هدا البيت وطلعك بره ….
    فإنتي بعديها ضليتي تحاولي بشتى الطرق إنك ترجعي هدا البيت بس ما قدرتي وبالآخر قدرتي ترجعي شقة وحدة من هالبيت فإشي طبيعي ومنطقي وعادي جدا بل مطلوب إنك تقولي هاي الغرفة غرفتي وأنا صاحبتها وبدي أتصرف فيها زي ما بدي
    بس اللي ما بصير ولا حد بقبلو إنك تقولي هاي الشقة إلي وباقي الدار إلك !!! لا … قولي هاي الشقة إلي والباقي أنا لسا رح أضل أحاول أرجعو…وهيك أنا ما بكون متنازل عن إشي بالعكس أنا رجعت جزء من داري اللي هي حقي
    تالت إشي وطولت بعرف….
    قلتي :” مع انو هو تنازل رسمي منا عن فلسطينا المحتله) .. يعني كنا متنازلين مش رسميا صرنا متنازلين رسميا ..”
    ههه مع الاحترام بس حضرتك مش فاهمة إشي  مين اللي قال إنو إحنا ما تنازلنا عن فلسطين المحتلة أو بالأحرى مين اللي قال إنو صاحب القرار ما تنازل ؟؟!! هدا الحكي من زماااااااان خلصوا منو من قبل 18 سنة متنازلين ومخلصين وهدا إشي معروف وما حدا بحكي فيه
    وأخيرا ….
    حسيت من كتابتك إنو مش فارقة معكي كتير المهم إنو ” أنا ” أعيش مرتاحة وبأمن واستقرار
    صحيح كلنا بنحب نعيش مرتاحين بس ما بدنا تكون راحتنا على حساب خمس ملايين لاجئ مضطهدين يا دوب ملاقيين لقمتين يوكلوها إلا إذا كانوا بعتمدوا على عطايا الناس والأونروا و بعرفش إذا عمرك زرتي مخيم من المخيمات وشفتي العيشة اللي عايشينها وإذا ما عمرك زرتيهم روحي شوفيهم عشان يفوت الحكي بمخك مزبوط
    “كثرة المتخاذلين اللي بالعالم لا تعني إنو فش ناس بدهم الحق أو إنو الحق مات لا الحق موجود وصحاب الحق موجودين بس للأسف إنهم ضعاف –بلاش تقوليلي دخيلك هو في حدا سائل بهالبلاد-”
    عموما المقال جميل وطريقة كتابتك حلوة وبسيطة ….

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s