ماجي فرح..أنا بكرهك…عن جد بكرهك..

مين أنت  اللي تقرري انو سنة 2011 مش سنتي…!!!! شو كاينه حضرتك؟؟؟

لا والظلم أنو أنا ما بحضرك انتي و لا اللي زيّك عشان حرام..و عشان بخاف أعرف المستقبل…. بس طلعتي موضوع الموسم…!!!

كنت قاعده مع ماما و صاحبتها (برجها زيي) و لّا خالتو بتحكيلي “يمامه 2011 مش سنتنا عشان برجنا داخل فيو زحل…!!!”

عصبت و حكيتيلها ماا بحب حد يحكيلي اشي عن الابراج….!!

بعد ساعه أنا و أخوي بالسيّاره فجأه زيد بحكيلي “يمامه يا حرام انت شو بستناكي  بهاي السنه” حكيتللو شو بستناني؟ حكالي مبارح  حضرت ماجي فرح حكو أنو أسوأ برج برجك عصبت عليه لأنو عن جد ادّايقت…!!!

شووو هاد؟؟؟ كييف يتفاولو علي هيك من وحده غبيّة زي هاي؟؟؟؟

لأ بعدين “مزح, احنا ما منصدق”

أرحموني اذا ما بتصدقو ليش تسمعوها…!!!

أن شاء الله رح تكون أحلى سنه بحياتي…و كل شي بدي ياه بصير زي ما بدي و أكتر….:)

و 1\1\2012  بكتب مدونه بثبت فيها انك كذّابه و 60 كذّابه…… أنا بعرف انك هيك بس عشان افرجي الناس

و كمان الكل بتهااون بالموضوع… التنجيم حرام حتلى لو ما صدقناه مع انو كل اللي بقرؤو أبراج (ما بقصد اللي بقرؤوا عن الشخصيات بقصد اللي بقرؤو عن المستقبل) بضحكو على حالهم لمَا يحكو ما منصدق… لانو بينهم و بين حالهم بكون أثّر فيهم و هم أكتر ناس عارفين….!


قال رسول الله صلى الله عليه و سلم “من أتى عرافا فسأله عن شيء لم تقبل له صلاة أربعين ليلة” صحيح مسلم

قال رسول الله صلى الله عليه و سلم “من أتى عرافا أو كاهنا فصدقه بما يقول فقد كفر بما أنزل على محمد”

الفرق بين الحديثين انو الاول من اتى مش من صدّق…!! بس “من اتى “يعني جرب بس ما صدّق….!!!

و بمناسبة السنه الجديده كل سنه و انتو سالمين… يارب بتكون سنة خير على الكل …🙂

10 thoughts on “ماجي فرح..أنا بكرهك…عن جد بكرهك..

  1. الرد الأول ..
    تفكيرك زيّ تفكيري .. والله الناس مسكينة بتصدق أشياء تافه😀
    الله يهدي الجميع يا رب
    كل عام وأنت بخير صديقتي، بتمنالك سنة سعيدة🙂

  2. أحييكي يمامة على هالموضوع
    حبيت الجملة الافتتاحية وفعلا مين هي حتى تقرر مصيرنا

    المشكلة انه تخيلي كم مليون شخص بيكونوا بنفس البرج وتخيلي كلهم كلهم رح تكون سنتهم سيئة كما افادتلهم المدام

    وأكيد قل لن يصيبنا الا ما كتب الله لنا

    وان شاء الله تكون سنة خير وسعادة عليكي وعلينا يا رب

    ودائما وأبدا “كذب المنجمون ولو صدقوا “

  3. نوووري نورتي..:) و لك المشكله ممكن تصدّقي لا ارادي عشان هيك ما بسمع أصلاً و الناس بطل في موضوع يحكو فيه غير الابراج,,

    رباااا و انا بالضبط هيك حكيت ..هلأ كل الناس اللي بنفس البرج الهم نفس القدر…تروح تروّح بلا هبل..و كذب المنجمون و لو صدقو..

    محمد عمر…تطلع روح اليهود يا رب… خلي زحل وين ما بدو مش فارقه معي :]

    كل سنه و انتو سالمين… يارب ينة خير و سعاده على الجميع…🙂

  4. “وما كان الله ليطلعكم على الغيب”سورة التوبة
    “عالم الغيب فلا يظهر على غيبه أحدا إلا من ارتضى من رسول فإنه يسلك من بين يديه ومن خلفه رصدا”سورة الجن
    يا إخوان الأمر بالآخر مش بسيط هاي أمور عقيدة يعني أي واحد بصدق هدول الناس أو غيرهم بموضوع التوقعات يعني عندو خلل بفهم عقيدتنا عقيدة الإسلام عقيدة التوحيد
    وبالآخر بنقول”كذب المنجمون ولو صدفوا “لأنهم بالآخر بتصدف معهم صدفة إذا إجى إشي معهم صح يعني الواحد فيهم بنجم50 تنجيمة -أصلا هي أي واحد بتوقعها- وإذا زبطت معو خمسة من خمسين الناس بتعملو ……. أستغفر الله العظيم

    وبالآخر شكرا يمامة على هالموضوع ولا يهمك إن شا الله بتيجي من 2012 بل 2222 وإنت إن شا الله كل سنة بتكتبي غن كانت سنتك أحسن من اللي قبليهاD:

  5. اكيد كله كزب و حكي فاضي .. لو الله بدو ايانا نعلم الغيب كان اعطانا 100 طريقة .. بس لأنه الخير في اننا ما نعرف الغيب الله حجبو عنا …
    بعدين انا برأيي الواحد هو الي بعملو يومه و شهره و سنته و كل عمره … ازا انتي اتوكلتي على الله و اشتغتلي على حالك اكيد رح تكون النتيجة حلوة لو كل العالم حكولك انها مش مفروض تكون هيك !!!
    بتمنى الك و لكل الي بتحبيهم سنة روووعة … مو مشان شي بس عشان تغيزيها لفرح هاي P:

    *yasmin badran*

  6. سلمى شكرأ كتير..:) يا رب بتكون سنة خير و سعاده و هنا على الجميع..
    أخي كركر..رد جميل جدأ ..حبيت الايات اللي استشهدت فيها…
    الحمدلله دائماً..انشاء الله كل سنينا بتكون حلوه..

    ياسمين..اهلا و سهلا فيكي بمدونتي🙂 ان شاء الله بتكون سنة خير على الجميع..انشاء الله بتكون سنة انجازات و تحقيق أحلام و اذا النيه موجوده ربنا كبير….:) بس عن جد الاشي اللي بقهر كتير أنو كيف الناس بحكو في الموضوع بجديّة و كانو اشي عادي أو انو منتسلى يا بتتزبط يا لأ…

  7. احلى شي لانو داخل فيه زحل :)))
    بس ما قالتلنا داخل من الجهة الشرقة و لا الشمالية، بتفرق لانو؟؟ D:

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s