هكذا هي الحياه…

سبحان الله كيف الدنيا.. عمري ماشفت   صغير الّا  نفسو يكبر لسّا بتذكر حالي و انا بلس كنادر ماما و شنتاتها و بمشي فيهم بالدار… و كل كبير بحكي بس لو نرجع صغار ما عنا هم و لا اشي شاغل بالنا ( مع انو الصغار شاغل بالهم انو نفسهم يكبرو)
كل طالب مدرسه بحلم باليوم اللي يدخل فيه الجامعه…..و هو بالجامعه “و الله المدرسه احلى” و و بالجامعه بعد كل امتحان ” بدي اتخرج بدي اتخرج ايمتى بخلص من قرف و هم الدراسه” و بس يتخرج شهر زمان (على الأكتر و مرات قبل شهر ) بصير بشتاق للجامعه و نفسو يرجع للجامعه… و يا ريت حد بسمع من حد… انا تخرجت قبل صاجباتي بسنه عشان هم هندسه و صيدله انا دراستي 4 سننين كانت و سنة تخرجهم زهقوني نق و هم يشكو و انت نيالك و خلصتي و بعرفش شو… و انا احكيلهم ” و الله الجامعه احلى..انتو اللي نيالكم.. يا ريت ارجع ادرس..و هم يحكولي ” طيب اسكتي بلا هبل”
لسا مبارح status صاحبتي شرين عل facebook كان
Shereen Aw : walkom malo kol bse7 3shan jam3a bkra,walla ma fe a7la men ayam jam3a ya ret trj3 law yom😦
و كان coment منى
Muna Dmaidi : bde jam3aaaaaaaaaaaaaaaaaaaaaa aa😥
هدول لسّا ما صرلهم اشي متخرجين..!!
و اللي بشتغل بكره شغلو و بدوش يصحى الصبح بكير و قرف و نكد الدوام  ..و اللي ما بشتغل بحكي  ” بشتغل شو ما كان بس اخرج من البيت” (مع انو كذب لو اشتغل رح يشكي من شغلو رح يستنى يوم الاجازه بالدقيقه )
كل عزّابي بدو يخطب…و بس يخطب بدو يتزوج…و لمّا يتزوج بضير يحكي “يرحم ايّام العزوبيه” او “يا الله لو ترجع ايام الخطبه” مع انو لمّا كان خاطب كان ما مصدق ييجي العرس..
و لما يتزوج بدو يجيب و لاد…. لمّا يكون الولاد صغار بغلبو و بنكدو بصير بدهم يكبرو عشان يخلصو من نكد الصغار…. و لمّا يكبرو الولاد ” يا ريت يرجعو صغار و الله مصاريفهم و همهم بس يكبرو اكتر )
و يوم ورا يوم و را يوم…الصغير بصير شب….و الشب بصير عجوز….
مبارح  عند دار سيدي شفت 6 اراجيل تيتا حاطتهم بالبوفيه مرسم عليهم اشياء و ازازهم حلو  بسألها اذا كانت تأرجل؟ “انا بعرف بس انو هيك بسأل” صارت تحكيلي عن ايام الاستقبالات و كيف لما يكون عندها الاستقبال تنشغل بتحضير الاراجيل (( تخيلو اعمل انا جمعة لصاحباتي هلأ و اعمل اراجيل بالبيت و مش بالبرنده بغرفة الصيوف كانو) و الله ابصر شو بعملو فيي..!!
حكيت بعقلي انو تيتا الله يخليها كانت في يوم ما قدّي و كانت تطلع مع صاحباتها و تروح و تيجي بس انا ما بعرفها غير “تيتا” فصعب استوعب الاشي…. و اذا الله اعطانا العمر رح ييجي يوم يكون في ناس ما بعرفونا الا “خالتو او تيتا او عمتو” ….
ما حد رح اكون بالنسبه الو “يمامه” اللي انا هلأ هيي الا صاحباتي و اخوتي” ….

يعني  تخيلو انو بعد 100 سنه من اليوم  علأغلب ما حد من سكان الارض الموجودين عليها اليوم رح يكونو فيها… و رح ييجو ناس غيرنا و يعيشو نفس حياتنا و يكونو صغار و يكبرو و يصيرو شباب و يعيشو و بعدين يكبرو و يموتو  و يمكن يجيبو سيرتنا و يحكو عن و يتذكرونا  (زي ما انا دايما بتذكر سيدي و عمتي ) يا رب لما ييجي هاد اليوم اللي نكون في ذكرى نكون  في حال منيح…
.سبحان  مدبّر الكون ملك الملوك خالق كل شي
بسم الله الرحمن الرحيم
(يَا أَيُّهَا النَّاسُ إِن كُنتُمْ فِي رَيْبٍ مِّنَ الْبَعْثِ فَإِنَّا خَلَقْنَاكُم مِّن تُرَابٍ ثُمَّ مِن نُّطْفَةٍ ثُمَّ مِنْ عَلَقَةٍ ثُمَّ مِن مُّضْغَةٍ مُّخَلَّقَةٍ وَغَيْرِ مُخَلَّقَةٍ لِّنُبَيِّنَ لَكُمْ وَنُقِرُّ فِي الْأَرْحَامِ مَا نَشَاء إِلَى أَجَلٍ مُّسَمًّى ثُمَّ نُخْرِجُكُمْ طِفْلاً ثُمَّ لِتَبْلُغُوا أَشُدَّكُمْ وَمِنكُم مَّن يُتَوَفَّى وَمِنكُم مَّن يُرَدُّ إِلَى أَرْذَلِ الْعُمُرِ لِكَيْلَا يَعْلَمَ مِن بَعْدِ عِلْمٍ شَيْئاً وَتَرَى الْأَرْضَ هَامِدَةً فَإِذَا أَنزَلْنَا عَلَيْهَا الْمَاء اهْتَزَّتْ وَرَبَتْ وَأَنبَتَتْ مِن كُلِّ زَوْجٍ بَهِيجٍ )




14 thoughts on “هكذا هي الحياه…

  1. آآآآآآآآآآآآآخ

    والله درر يا يمامة،، والله هيك الحياة وهيك الانسان ما حدا بيعجبه الوضع اللي هو فيه
    دايما مستعجل ومتصربع :p عالخطوة التانية وما حدا بيعيش كل مرحلة كاملة بخيرها وشرها وبيستمتع فيها

    وقال عز وجل: “وَكَانَ الْأِنْسَانُ عَجُولاً” صدق الله العظيم

    هيك حياة البشر بيستعجلوا كل شي ولما يجي اللي استعجلوه بيصيروا يندموا ويتمنوا يرجعوا للي قبل ،،

  2. بس بتعرفو؟!
    زي كأنو الله خالقنا هيك يعني جزء من الطبيعه البشريه الانسان يكون هيك انو مش ذنبنا…
    و لو انو احنا ما منعطي الدنيا اكتر من حجمها كان كنا مبسوطين…

    في هاد المقال راائع انا كتير حبيتو الو بالموضوع ما بعطي حل بس بفهمنا شوي

    http://www.zeinz.com/mostafamahmod/

    شكراً ربا و عمر على المرور زوروني دايماً …:))))

  3. haboool 7abet ele katbteeeeh ,, o zakrtene bb3ad elnas ele bdhm yesht’3lo o bne2o lma saro yesht’3looo

    o sho elmane3 ma t3mleelna este2bal o t7otelna araaajel haaa??
    luv ur post :))

  4. hahahaha😀 o ana tzakkarthom hadok al nas …!!
    o bl nesbeh lul argeeleh….wala bl a7laaam argeeleh jowwa al dar law 3ala 2ate3 ra2beeteee……wala 7atta 3l barandaa…!😀
    e7na 3enna al arageel lul manzar bs to7af mnesta3melhom 3ashan ma men2argel😀😀
    my post luv u too… thxxx :D:D:D

  5. كلام صحيح ..!
    ما في حدا عاجبوا وضعوا فينا، لا كبير ولا صغير !
    ممكن يكون هذا اختبار من ربنا انه يشوف قديش قدرتنا على الصبر و التحمل ..
    بوافقك الرأي ” س بتعرفو؟!
    زي كأنو الله خالقنا هيك يعني جزء من الطبيعه البشريه الانسان يكون هيك انو مش ذنبنا…
    و لو انو احنا ما منعطي الدنيا اكتر من حجمها كان كنا مبسوطين… ”
    و المقال روعة..
    و بالنسبة لا بعد 100 سنة فأكيد يعني إن شاء الله الناس رح يذكروكي بكل خير .. لأنه الي في صباه مرضي و محبوب في كبرو هيك بكون
    أحببت الموضوع جداً و كنت ناوية أكتب عنه😀
    لمزيد من التفوق و النجاج إن شاء الله
    Amazing❤!

  6. نووووووووووور شكر اًعلى الرد…..انت الرائعه🙂
    الله يقدرنا ننجح بالاختبار لانو عن جد بوصل الواحد مرحله بكون مش قادر يتحمل….
    و بالنسبه لانهم الناس رح يذكروني بالخير يا رب… بس انت لسا ما بتعرفيني منيح بركي كنت شريره و انت ما بتعرفي؟؟😀 🙂
    الموضع كمان حبك..يللا اكتبي زيو او غيرو و قرئيني,,,:))))))))

  7. أنا واصلة للحالة هاي هلأ، ربنا ما يوصلك لا الها😀
    المهم .. الموضوع بجنن مثل ما ذكرت قبل
    و بالنسبة لا انو انا ما بعرفك فهو صحيح، بس ربنا دايماً لما يحب عبد من عباده بحبب عباده فيه وأنا حبينك
    و بالنسبة لا شريرة فما أظن😀 و اذا كان صحيح فا منك لا ربنا😛
    إن شاء الله بقرأك اشي عن قريب😉

  8. ما تخافي وصلتها كتير..و هلأ بجرب اتغلب عليها…
    بس و الله الحياه صعبه قصدي حلوه بس نفهمها,…:)😀
    الحمدلله على كل حال …
    و بمناسبة انك حبيتيني انا كمان حبيتك يا رب ربنا يحبني و يحبك و يحب كل اللي منحبهم..🙂
    يللا بستنى اقرألك اشي…:)

  9. الموضوع كتير حبيته وحسيته صحيح
    وخصوصا اني هسا بمرحلة ايام الجامعة الأولى واني بشتاق للمدرسة كثير
    مع اني ايام المدرسة ما كنت بحبها
    وكثير عجبتني مدونتك ومواضيعك😀

  10. اهلاً سراب…نورتي المدونه
    كتير انبسطت بردك….فعلا هاي حاله بتصيب الجميع فنصيحه انبسطي بالجامعه كتيييير ما تخلي شوية دراسه تنكد عليكي..:)
    شكلها ربا عملت للمدونه دعايه ؟ ياااي ما أحسنها..:d

  11. ههههه
    لأ هي مدونتك عاملة لحالها دعاية بمواضيعها الحلوة🙂
    مش من ربى لانها ما حكتلي
    انا لحالي طلتها ^_^

  12. الله يسعدك سراب انت الحلوه ,,
    اصلاً هاي ربا بتعملش دعايه الي عشان بتغار مني..:D😀😀

  13. تنبيه: تجمع المدونين الفلسطينيين

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s