رحلتي الى العمره…

كانو  12 يوم من العمر ما بعرف كيف مرو و لا عمري كنت متخيله انو رح انبسط بالسعوديّة كل ما حد يحكي سعوديه بخطر في بالي المطوعين(الي لبلفو بصيحو على الناس شو يلبسو و شو ما يلبسو ) و بخطر في بالي الشوب و التعصب الديني,,, انو ما بيجي في بالي اشي حلو… اكيد من زمان جعبالي اعمل عمره بس مش عشان انها اشي حلو كان بدي اعملها عشان طاعه و بدي اعملها,,,من قبل ما اسافر و انا هاكله هم الطريق الطويله و الجسر و الاستراحات… بس الحمدلله كانت ميسره فوق ما توقعت مر الوقت بالحكي و بالأكل و بالنوم و بالاستراحات و قبل ما نوصل مدينة رسول الله صلى الله عليه و سلم بدأ مرشد الرحله بتشويقنا و تذكيرنا بفضل الصلاه على الرسول ..و صلنا المدينه و نزلنا الفندق حطينا اغراضنا و توضينا و نزلنا على المسجد النبوي تفاجأنا بأعداد الناس اللي رايحيين على الصلاه زي كأنها مظاهره  يعني لو وصلنا بين الأذان و الأقامة ما كان لقينا مكان نصلي فيه… هو بالآخر اللي بيجي بلاقي بس بصعوبة (هاد و الدنيا شوب و لا هي رمضان و لا حج )بناء المسجد رائع ..الاهتمام بالنظافه و راحة الزوار رهيب كل شي متوفر من مصاحف, كراسي للبصلي و هو قاعد, ماء زمزم , تكييف بكل مكان حتى بالساحات في اعمده بتخرج هوا بارد..يعني الشوب مش مانع ابداً للناوي يروح….

طبعاً أهم اشي بالزيارة المدينه وهو زيارة قبر  الرسول عليه الصلاة و السلام و قبر سيدنا ابو بكر و سيدنا عمر  و الروضه الشريفه لسّا ما عملناه…. النساء الهم مواعيد محدده للزياره  سألنا عنها و قررنا نروح الساعه سبعه الصبح من اليوم التاني (قال ماما بتحكي هاد أحسن و قت عشان ما رح يكون مليان)… رحنا بعد صلاة الفجر و منفكر حالنا اول ناس بس نصدمنا لما شفنا الآلاف اللي واصلين قبلنا …فتحو باب الروضه و الناس بالنابلسي ” دشعت” بطلت امشي صارو الناس يمشوني زي كيف شلال مي بس هاد شلال ناس المهم في سجاد احمر و سجاد أخضر السجاد الأخضر هو الروضه الشريفه من كتر الناس ما قدرت اصلي فيها بس سجدت سجدة شكر انو الله خلاني اوصل لهاد المكان لانو في حديث عن الرسول ما( بين بيتي ومنبري روضة من رياض الجنة  .

و خلصت ايامنا الأربعه في المدينة المنورة..مدينة رسول الله…

صار وقت نروح على مكه …. مكه التي قال فيها رسول الله عندما اخرجوه منها  “ أنتِ أحبّ بلاد الله إليّ، ولولا أن أهلك أخرجوني منك، لم أخرج منك،) …مكه اللي فيها الكعبه المشرفه … مكه البلد الحرام اللي فيها المسجد الحرام الصلاه فيه بمئة الف صلاة…مكه مكان ما بدنا نعمل عمره,,,,,,

مرينا على آبيار علي عشان نحرم الشباب و الرجال لبسو اواعي الاحرام البيض و حكينا كلنا ” لبيك اللهم عمره فأن حبسني حابس فمحلّي حيث حبستني) يعني انا محرم لعند ما اعمل العمره و اتحلل من الأحرام اذا صار مانع و ما قدرت  اعمل العمره  بحل احرامي..

وصلنا مكه و احنا محرمين و بدنا نعمل العمره بعد المغرب عشان ما تكون شمس.. نزلنا من الفندق و اتجهنا على المسجد الحرام كنت انا و ماما و كريم اخوي….انا و ماما اول مره منيجي و كريم ما شاء الله كانت هاي المره التالته الو بعتمر فيها… كريم بالنص و انا على الشمالو و ماما على يمينو و ما سكين فيه  وصلنا المسجد الحرام و صرنا ندخل يعني باي لحظه بدنا نشوف الكعبه و في أثر انو الدعاء أول ما تشوف الكعبه مستجاب كريم طول الطريق يحكيلنا حطو عيونكم بالأرض عشان ما تشوفو الكعبه شوي شوي , تشوفوها كلها مره وحده أحلى…وصلنا قدّام الصحن (محل الطواف) و رفعنا راسنا نشوف الكعبه….  اشي لا يوصف قدّيش كان المشهد رائع كلنا نبكي (مع انو انا مش من الناس اللي ببكو و بتأثرو بسرعه) بس فيها اشي  بخليك تنبهر و اضلّك بدك تطلع فيها حتى من اللخمه نسيت ادعي بعدين تذكرت و دعيت….كل حد بروح على العمره كان يحكيلنا عن انو شوفة الكعبة حلوه بس انا ما تخيّلت تكون هيك….

صلينا المغرب و بلشنا العمره….طفنا حول الكعبه 7 مرات و كل مره نوصل الحجر الأسود نأشر عليه و نحكي “بسم الله و الله أكبر اللهم ايماناً بك و وفاء بعهدك و اتباعاً لسنة نبيك محمد صلى الله عليه و سلم و ندعي و ندعي و ندعي….و نتخيل انو الملائكه في البيت المعمور  بطوفة زينا ..و انو كل شي بالدنيا بطوف حولين اشي..كيف الالكترونات بطوف حول النواه بالذرّة … و الأرض يدور حولين الشمس….

بعدين رحنا شربنا من مية زمزم  و صلينا العشا…و بدينا السعي بين الصفا و المروه … الطواف ما باخد وقت بس السعي نسبيّاً مسافته طويله و طول ما احنا ماشيين و احنا ندعي…. و السعوديّة موفره كل شي يعني مي و براد و في كتير ناس بس ما في تزاحم لانو المكان واسع… خلصنا السعي و هيك خلصنا العمره …. مش اكتر من 3 ساعات بتاخد… و الحلو انو الواحد يستشعر و هو عم بسعى انو هاد الاشي اللي هو هلأ عم بعملو مذكور في القرآن و انو السيده هاجر عملتو في وقت كانت في امس الحاجه إلى الله و في قمة التوكل عليه حتى خرج لها ماء زمزم… بسم الله الرحمن الرحيم “إِنَّ الصَّفَا وَالْمَرْوَةَ مِنْ شَعَائِرِ اللَّهِ فَمَنْ حَجَّ الْبَيْتَ أَوِ اعْتَمَرَ فَلَا جُنَاحَ عَلَيْهِ أَنْ يَطَّوَّفَ بِهِمَا وَمَنْ تَطَوَّعَ خَيْرًا فَإِنَّ اللَّهَ شَاكِرٌ عَلِيمٌ”

يوم الجمعه صلينا الجمعه و ام فينا السديس و السبت صلينا الفجر وودعنا الحرم المكي بالدموع…

اللهم لا تجعله آخر العهد ببيتك…اللهم ارزقنا زيارة بيتك الحرام أعواماً عديدة و أزمنة مديدة…

و صدق الله العظيم القائل على لسان سيدنا ابراهيم
” وَإِذْ قَالَ إِبْرَاهِيمُ رَبِّ اجْعَلْ هَذَا الْبَلَدَ آَمِنًا وَاجْنُبْنِي وَبَنِيَّ أَنْ نَعْبُدَ الْأَصْنَامَ (35) رَبِّ إِنَّهُنَّ أَضْلَلْنَ كَثِيرًا مِنَ النَّاسِ فَمَنْ تَبِعَنِي فَإِنَّهُ مِنِّي وَمَنْ عَصَانِي فَإِنَّكَ غَفُورٌ رَحِيمٌ (36) رَبَّنَا إِنِّي أَسْكَنْتُ مِنْ ذُرِّيَّتِي بِوَادٍ غَيْرِ ذِي زَرْعٍ عِنْدَ بَيْتِكَ الْمُحَرَّمِ رَبَّنَا لِيُقِيمُوا الصَّلَاةَ فَاجْعَلْ أَفْئِدَةً مِنَ النَّاسِ تَهْوِي إِلَيْهِمْ وَارْزُقْهُمْ مِنَ الثَّمَرَاتِ لَعَلَّهُمْ يَشْكُرُونَ”

و اجعل أفئدة من الناس تهوي اليهم , أفئده =قلوب و ما حد بروح على مكه و ما بحب و بتمنى انو  يرجعلها ..و أنا أشهد.

أشياء عرفتها ما كنت أعرفها او ما كنت مستوعبتها:

  1. الناس اللي بعبدو الله كتير كتار يعني احنا بملكوت ربنا اشي لا يذكر…
  2. اللي ناوي حج او عمره يعملهم و هو شب و بصحتو و قوتو مزبوط الرحله حلوه بس فيها تعب شوي و هيك العمره اللي هي بس طواف و سعي فما بالكم الحج يعني طول ما انا هناك و أنا أفكر ببابا كيف بدو يحج عشان قد ما كان للكبار فيها مشقه.

و انا بعمل العمره شفت كتير اشياء خلتني احكي الحمدلله انو انا بصحتي… شفت وحده عم بطوف بزوجها الضرير و بدلّو على الطريق….شفت كتير شباب بجرو كراسي اهلهم الكبار بالسن… شفت واحد جزائري بطوف بالطابق فوق (محل لطواف الاحتياجات الخاصه) معو غرغرينا بأجرو يا لطيف منظر اجرو بخوف و ماشي على كرسي متحرك بس هو بسوقو مو حد بسوقلو ياه…. كل هاي الاشياء بتخلينا نحكي انو يا رب الله يباركلنا بصحتنا و يطعمها للجميع بالصحه و العافيه و عن جد لازم اللي بقدر يطلع يحج ما منعرف شو بستنانا بالمستقبل..

3. خادم الحرمين الشريفين ما قصر و الله –بغض النظر عن كل شي -بس الناس الي بشتغلو بالحرمين بشتغلو زي خلية النحل… الأرض باليوم الآلات بتمسحها 100 مره و الغبره كل شوي بمسحوها.. مع انو آلافات مؤلّفة  من الناس و اللي باكل و اللي معو صغار بوسخو و بلعبو كل شي ما بلحق يتوسخ الّا هم منضفينو..يعني اللي بصلي بالساحات بره حتى لو ما كان معو سجاده الأرض كتير نضيفه… يا رب الله يبعت للمسجد الأقصى الحزين حد يهتم فيه هيك و يفك أسرو…

4. في شعوب و كتير كتار خزق الأنف عندهم للبنت زي خزق الأذن عنا… يعني بتكون وحده عمرها 70 سنه و حاطه حلق بأنفها اللي حاطين حلاق اكتر من اللي مو حاطين …هيهيهيه اجا عبالي واحد .

5.في حرية لبس بالسعوديّة ما توقعتها الحجاب او خلينا نحكي” الشاله” الكل حاطتها بس  شفنا لبس اشكال ألوان كل بلد جايين باللبس اللي هم بلبسوه اصلاً و ملون و مزركش و في مبينين دانهم و منزلين غره  و ما حد بحكي معهم يعني انا ما كنت متوقعه هيك ابداً أبداً . مش عارفه اذا هيك في كل مكان و لّا بس بجهة الحرم على أساس انهم اجانب لأنو السعوديات غالبهم لابسين نقاب و عبايات.

6.تعلمت صلاة الجنازه..لانو بمكة او بالمدينة كل صلاة فريضه لازم يصلو على ميّت او على طفل و بدعي للصلاة هيك “الصلاه على الأموات يرحمكم الله” او ” الصلاه على المرأه و الطفل يرحمكم الله ” او  ” الصلاه على الأموات و النساء و الأطفال يرحمكم الله ” بالجمله بصلو عليهم يا لطيف..!  زي كأنو كل وفيات السعوديه بصلو عليهم بالحرم..بس صلاه الجنازه قصيره كتير و أجرها عظيم.

7.الحمام بمكة كتير كتير..في  كل مكان خاصه وقت الفجر بكون كتير  حمام و حرام تخويفو و قتلو عشان مكه بلد حرام.

8. المدينة كتير حلوه…بس مكه احلى…مكه غير ..

15 thoughts on “رحلتي الى العمره…

  1. كتييييييييير حلوة الكتابة🙂
    الله يطعمنا عمرة و حجة يا رب .. و الله اجو على بالييييي
    تقبل الله طاعتكم

  2. روعه حبيبتي يمامه بجد شوقتيني كتييييييييييييييييييييييييير وبجد اتأثرت فيها كتير الله يطعمنا اياها ويطعمها لكل شخص مشتهي يا الله..
    ان شاء الله تكوني دعيتيلنا

  3. كتير حلو الحكي والوصف ونيااااااااالك
    والله يعطينا العمرة
    ويخلينا كلنا نزور مكة والمدينة لأنه عن جد من أروع وأقدس الأماكن
    وتاريخ المسلمين وحضراتهم كلها هناك

    وان شاء الله ربنا بينولنا الحج ياااااااااارب

  4. Yamaaa jaad jaad bejaneeeeen !!!!! 3njaad y3ne masha2alla shw2tenee 2roo7 hl2 hl22 wallaaa!!!! o inshallaa 3mraa m2boleeeh yaa rb :):):) o 3njaad t2ssret lmma ktbtee enno ma bdk tshufe el k3bee shwy shwy bdk tshufeha marra w7deeh 3njaad eshe kteer 7elo elle 3mlteeeh :D:D o el 27la o 27laa eno bketo lmma shuftohaaa :(:( o inshalla allh y63mkon 3mra tnyeh o taltee… o y63mna m3koom
    o shokraan kteer kteeer kteeer 7bebty la ennk d3eteleee😦
    i will never forget it!!!

  5. كتيييييييير حلو يمامه الله يرضى عنك ويتقبل منا ومنك ويارب يسر العمره لكل اللي حابب يزور قبر الرسول ويشوف الكعبة يااااارب وربنا يسعد يا غاليه اسعدتيني بالقراءة وشوقتينا

  6. يللا الحمد لله بدي أصير مشهور اسمي مكتوب بالخاطرة ممتاز يللا الله يا ربي يتقبل منا ومنك ومن الجميع ويرزقنا من فضله ويجعلها بداية حياة ايمانية جديدة اللهم طهر قلوبنا واغفر ذنوبنا …مقال رااائع طبعا !

  7. والله يا يمامه بتمنى اكون بهاد المكان الي ذكرتيه كتير رائع انو الواحد يزور مكه والمدينه هاي مناي وانا بتمنى انو الكل يزورها ويارب ينولنا اياها ويحسن من خاتمنتا ,,,والحمد لله على سلامتك🙂 ويا زعره اتاريكي بتعرفي تكتبي بأسلوب شيق …
    وعقبال الحج — يا احلى يمامه

  8. يمومة اول شي الف مبرووووووووووووووك العمرة وعقبالك وعقبالنا كلنا نروحها يا رب …. والله يطعمها لكل مشتهي (هادي بالنابلسي). ثانيا انا انا مضيوفة ومش عم بصحلي اعمل شي مع اني والله كتتتتتتتتتتتتتتتتتتتتتتتتير اشتقتلك وان شاء الله بشوفك عن قريب🙂

  9. اهلا بك..:)
    شفت الصور ما شاء الله كتير حلوين..:)
    كل مكة و المدينة حلوين لدرجه ما بتنوصف…الله يكتبلنا زيارتهم دائما,,,

  10. تنبيه: تجمع المدونين الفلسطينيين

    • شكراً على الروابط…كمان انا بحب اقرا تجارب حج و عمرة
      الله يقبل من الجميع…

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s